“Ita mós bele foti pioneiru!”
1. Oinsá mak irmán ida sente kona-ba ninia serbisu nuʼudar pioneiru?
1 Irmán ida naran Kathe B. Palm hatete: “Ba haʼu, la iha serbisu ida neʼebé diʼak liu no halo haʼu kontente liu.” Nia serbisu nuʼudar pioneiru ba tinan barak iha rai-Xile iha Amérika Súl, hodi haklaken iha rai neʼebé malirin tebes no mós rai neʼebé manas tebes. Hodi hanoin bensaun barak neʼebé pioneiru sira hetan, karik ema ruma hatete ona ba Ita: “Ita mós bele foti pioneiru!”
2. Tansá mak serbisu ba Maromak Jeová lori haksolok boot mai ita? Esplika toʼok.
2 Serbisu neʼebé lori haksolok: Jesus neʼebé fó ezemplu diʼak mai ita, nia sente haksolok hodi halo tuir ninia Aman nia hakarak. (Joao 4:34) Tan neʼe kuandu Jesus hanorin ninia dixípulu sira katak serbisu ba Maromak mak halo sira haksolok liu, nia hatete nuneʼe ho laran. Ita sente kontente tebes kuandu ita uza ita-nia moris atu halaʼo serbisu neʼebé halo Maromak Jeová kontente. Liután neʼe, kuandu ita uza ita-nia tempu, forsa, no osan atu ajuda ema seluk, ita sente kontente tebes.—Apos 20:31, 35.
3. Se uza tempu barak liu iha serbisu haklaken, ita bele hetan haksolok saida deʼit?
3 Kuandu ita uza tempu barak liu iha serbisu haklaken, ita mós iha oportunidade barak liu atu haksolok hodi halaʼo estudu Bíblia. Maski ita sente katak ema barak la hatudu interese ba lia-loos, nuʼudar ita aumenta esperiénsia no matenek, karik ita sei hetan ema neʼebé rona ita. No se ita serbisu nuʼudar pioneiru ba tinan ida ona, ita mós bele tama Eskola Serbisu Pioneiru, no ita bele uza edukasaun neʼebé ita simu iha ita-nia serbisu haklaken. (2 Tim 2:15) Se ita badinas nafatin, ita bele hein katak fini lia-loos nian neʼebé ita kuda aban bainrua sei fó fuan.—Ecle 11:6.
4. Joven sira neʼebé besik atu ramata eskola bele planu atu halo saida?
4 Joven sira: Se Ita mak joven neʼebé besik atu ramata eskola, Ita hanoin ona kona-ba Ita-nia futuru ka lae? Agora Ita uza tempu barak iha eskola, maibé oinsá kuandu eskola ramata? Duké hanoin atu buka serbisu diʼak hodi manán osan, karik Ita bele halo planu atu foti pioneiru no halo orasaun kona-ba neʼe ka lae? Ita sei aprende buat barak iha serbisu haklaken, Ita bele koʼalia ho ema oioin, aumenta Ita-nia matenek atu hanorin ema, hatudu hahalok diʼak no dixiplina Ita-nia an, no buat sira-neʼe sei ajuda Ita ba tempu kleur.
5. Oinsá mak inan-aman no kongregasaun bele fó laran-manas ba joven sira atu foti pioneiru?
5 Se Ita mak inan ka aman, Ita fó laran-manas no ajuda Ita-nia oan sira atu foti pioneiru ka lae? Ita-nia liafuan no Ita-nia ezemplu iha forsa boot no bele book sira atu buka uluk Maromak nia Reinu iha sira-nia moris. (Mt 6:33) Irmaun ida naran Ray neʼebé komesa pioneiru kuandu nia ramata SMA, nia hatete: “Haʼu-nia inan sempre hatete katak pioneiru mak serbisu neʼebé lori haksolok liu iha ita-nia moris.” Ita hotu iha kongregasaun laran mós fó laran-manas ba malu atu foti pioneiru liuhusi ita-nia liafuan no hodi ajuda malu. Irmaun ida husi rai-España naran José hatete: “Irmaun no irmán sira iha haʼu-nia kongregasaun haree katak pioneiru mak serbisu neʼebé diʼak liu ba joven sira. Sira koʼalia diʼak no hafolin serbisu pioneiru no sira mós ajuda pioneiru sira iha dalan oioin, tan neʼe haʼu ladún sente susar atu komesa pioneiru.”
6. Se ita ladún iha hakarak atu foti pioneiru, ita bele halo saida?
6 Buat neʼebé bele hapara ita: Maibé oinsá se Ita hanoin: ‘Haʼu ladún iha hakarak atu foti pioneiru.’ Se nuneʼe, halo orasaun ba Maromak Jeová hodi fó sai Ita-nia sentimentu, karik Ita bele hatete: ‘Haʼu la hatene se serbisu pioneiru neʼe diʼak ba haʼu ka lae, maibé haʼu hakarak halo buat neʼebé halo Ita-Boot kontente.’ (Sal 62:8; Prov 23:26) Depois, buka Maromak nia matadalan husi ninia Liafuan no ninia organizasaun. Irmaun-irmán barak “koko” atu foti uluk pioneiru ausiliár, no haksolok neʼebé sira hetan husi serbisu neʼe mak book sira atu foti pioneiru regulár.—Sal 34:8.
7. Se Ita hanoin katak susar atu hatama oras 70 fulan-fulan, Ita bele halo saida?
7 Oinsá se Ita hanoin katak susar atu hatama oras 70 fulan-fulan? Se nuneʼe, diʼak atu koʼalia ho pioneiru sira neʼebé iha situasaun hanesan ho Ita. (Prov 15:22) Diʼak mós atu halo programa oioin no hili ida neʼebé diʼak liu ba Ita. Ita bele haree katak ladún susar atu fahe tempu ba serbisu haklaken hodi hamenus atividade neʼebé ladún importante.—Ef 5:15, 16.
8. Tansá mak diʼak atu haree fali ita-nia situasaun?
8 Haree fali Ita-nia situasaun: Ita-nia situasaun troka beibeik. Tan neʼe diʼak atu haree fali ita-nia situasaun. Porezemplu, tanba Ita sai katuas ka ferik ona, karik Ita la presiza serbisu barak atu buka osan hanesan uluk. Irmaun ida naran Randy neʼebé hili atu ramata ninia serbisu hatete: “Tanba haʼu foti desizaun neʼe, haʼu bele komesa pioneiru regulár hamutuk ho haʼu-nia feen, no ida-neʼe fó oportunidade mai ami atu muda ba área neʼebé presiza haklaken-naʼin barak. Desizaun neʼe lori bensaun barak mai haʼu, maibé bensaun neʼebé boot liu hotu mak haʼu bele iha laran moos iha Maromak nia oin.”
9. Kaben-naʼin balu bele hanoin kona-ba saida?
9 Kaben-naʼin balu haree didiʼak sira-nia situasaun no hatene katak feen la presiza serbisu barak hanesan agora. Karik família presiza halo sira-nia moris simples liu, maibé ida-neʼe sei lori bensaun barak. Irmaun ida naran João nia feen para serbisu ba tempu tomak atu bele foti pioneiru, no João hatete: “Buat neʼebé halo haʼu kontente liu mak hatene katak haʼu-nia feen serbisu barak ba Maromak Jeová.”
10. Saida deʼit mak book ema kristaun atu foti pioneiru?
10 Hatudu domin no fiar: Maromak Jeová fó serbisu haklaken mai ita hotu nuʼudar serbisu neʼebé importante liu. Mundu aat neʼe besik ona atu ramata, no ema neʼebé bolu Maromak Jeová nia naran deʼit mak sei hetan salvasaun. (Rom 10:13) Ita-nia laran nakonu ho domin no hafolin buat neʼebé Maromak Jeová halo ona ba ita, ida-neʼe sei book ita atu halo tuir mandamentu husi ninia Oan atu haklaken ho badinas. (Mt 28:19, 20; 1 Joao 5:3) No mós tanba ita fiar duni katak ita moris iha loron ikus sira, ida-neʼe book ita atu hakaʼas an hodi haklaken ba ema hotu durante tempu neʼe sei iha, duké buka haksolok iha mundu aat neʼe.—1 Kor 7:29-31.
11. Se ema ruma hatete “Ita mós bele foti pioneiru”, Ita sei hanoin oinsá?
11 Pioneiru regulár laʼós katak hatama oras barak deʼit. Maibé liuhusi serbisu neʼe, ita hatudu ita-nia laran-metin no domin ba Maromak. Tan neʼe, se Ita-nia maluk ruma hatete “Ita mós bele foti pioneiru”, Ita simu ida-neʼe nuʼudar liafuan neʼebé gaba Ita no fó laran-manas ba Ita. Halo orasaun no hanoin toʼok oinsá mak Ita mós bele hola parte iha serbisu neʼe hamutuk ho irmaun no irmán sira neʼebé haksolok tebes.
[Liafuan neʼebé foti husi pájina 4]
Inan-aman sira, imi fó laran-manas no ajuda imi-nia oan sira atu foti pioneiru ka lae?
[Liafuan neʼebé foti husi pájina 5]
Maromak Jeová fó serbisu haklaken mai ita hotu nuʼudar serbisu neʼebé importante liu.