Uluk Ita serbí nuʼudar pioneiru regulár ka lae?
1. Ema barak haksolok ho knaar espesiál saida? Maibé ema balu tenke halo saida?
1 Husi uluk toʼo agora, ema rihun ba rihun haksolok ho knaar espesiál atu “hanorin no haklaken” lia-foun diʼak hodi serbí nuʼudar pioneiru. (Apos 5:42) Maibé tanba razaun oioin, sira balu tenke para serbisu neʼe. Se uluk Ita serbí nuʼudar pioneiru regulár, diʼak atu haree fila fali Ita-nia situasaun hodi hatene se Ita bele ka lae komesa fali halo serbisu neʼe.
2. Tansá mak sira neʼebé uluk serbí nuʼudar pioneiru tenke haree fali sira-nia situasaun?
2 Situasaun troka: Karik razaun neʼebé halo Ita para serbí nuʼudar pioneiru iha tempu uluk agora la iha ona. Porezemplu, se uluk Ita para serbí nuʼudar pioneiru tanba susar atu hetan oras 90 fulan-fulan, Ita bele ka lae komesa fali tanba agora Ita presiza hetan deʼit oras 70? Karik agora Ita la presiza ona serbisu ba tempu naruk, ka agora Ita-nia responsabilidade ba família sai menus liu fali tempu neʼebé Ita para serbisu pioneiru. Irmán ida neʼebé tenke para serbisu pioneiru tanba moras konsege serbí fali nuʼudar pioneiru kuandu nia tinan 89. Ba tinan ida liu nia la bá ospitál no nia sente katak ho saúde neʼebé diʼak nia bele serbí fali nuʼudar pioneiru!
3. Oinsá mak família bele ajuda ema ida husi sira-nia família atu serbí nuʼudar pioneiru?
3 Karik Ita la halo serbisu nuʼudar pioneiru iha tempu uluk, maibé ema ida husi Ita-nia família para serbisu neʼe tanba nia tenke tau matan ba família, hanesan inan ka aman neʼebé ferik-katuas ona. (1 Tim 5:4, 8) Se nuneʼe, Ita ho ema seluk iha Ita-nia família bele halo buat ruma atu ajuda nia ka lae? Diʼak atu koʼalia kona-ba neʼe nuʼudar família. (Prov 15:22) Kuandu família ajuda malu hodi sira ida bele serbí nuʼudar pioneiru, ema hotu iha família laran bele sente katak sira mós apoia serbisu importante neʼe.
4. Oinsá se Ita-nia situasaun agora la husik Ita atu serbí fali nuʼudar pioneiru?
4 Labele sai laran-tun se Ita-nia situasaun agora la husik Ita atu serbí fali nuʼudar pioneiru. Maibé hodi hakarak atu halo serbisu neʼe, ida-neʼe halo Maromak Jeová kontente. (2 Kor 8:12, MF) Uza matenek neʼebé Ita hetan kuandu Ita sei serbí nuʼudar pioneiru bainhira Ita halaʼo serbisu haklaken. Fó-hatene Ita-nia hakarak ba Maromak Jeová liuhusi orasaun, no buka oportunidade atu hadiʼa Ita-nia situasaun. (1 Joao 5:14) Karik ikusmai, Maromak Jeová sei loke ba Ita “odamatan luan” atu Ita bele haksolok hodi serbí fali nuʼudar pioneiru regulár.—1 Kor 16:9.