Ita-nia matan simples ka lae?
1. Iha matan simples katak sá?
1 Buat neʼebé ita-nia matan haree book ita-nia hahalok. Tan neʼe mak Jesus hatete: “Ó-nia matan diʼak karik, ó-nia isin tomak sei nabilan.” (Mt 6:22) Kuandu ita-nia matan “diʼak” ka simples, neʼe katak ita hanoin liuliu mak atu halo Maromak nia hakarak. No mós, katak ita tau uluk Maromak nia Reinu iha ita-nia moris no ita la husik sasán ka atividade seluk hanetik ita atu halo serbisu haklaken.
2. Saida mak bele halo ita hanoin sala? Maibé, saida mak bele ajuda ita?
2 Presiza hanoin didiʼak saida mak importante liu: Dala ruma, tanba ita haree iklan barak no haree buat neʼebé ema seluk iha, ida-neʼe halo ita hanoin sala kona-ba buat neʼebé ita presiza. Antes ita hanoin atu halo ka sosa buat ruma, neʼebé presiza tempu no osan barak atu hetan, diʼak atu ita “sura buat neʼebé kuran” hodi husu ita-nia an: ‘Ida-neʼe sei ajuda haʼu atu halo haʼu-nia serbisu ba Maromak Jeová diʼak liután ka sei hanetik haʼu atu halo serbisu neʼe?’ (Lc 14:28; Flp 1:9-11) Importante mós atu ita hanoin didiʼak kona-ba oinsá mak ita bele halo ita-nia moris simples liután hodi bele aumenta ita-nia serbisu haklaken.—2 Kor 13:5; Ef 5:10.
3. Saida mak ita bele aprende husi irmán ida neʼebé halo mudansa atu moris simples liu?
3 Kuandu irmán ida komesa atu serbí nuʼudar pioneiru regulár, maski nia bele halo serbisu ba loron balu deʼit atu manán osan neʼebé toʼo ba ninia presiza, maibé nia foti desizaun atu halo nafatin serbisu buka osan ba tempu tomak. Ikusmai, nia hatete: “Ema ida la bele serbí ba naʼi-ulun rua. Entaun, haʼu husik tiha haʼu-nia hakarak no buka deʼit buat neʼebé haʼu presiza. Haʼu rekoñese katak sasán sira lakleur sai tuan no katak haʼu sai kole atu hetan foun fali.” Tan neʼe, nia halo mudansa balu atu bele moris simples liu, no nia troka serbisu hodi bele kontinua ninia serbisu nuʼudar pioneiru.
4. Tansá mak importante tebetebes atu ita agora mantein nafatin matan neʼebé simples?
4 Tanba tempu badak liu ona, importante tebetebes atu ita mantein nafatin matan neʼebé simples. Loron ida-idak neʼebé liu daudaun, lori ita besik liu ba mundu neʼe nia rohan no ba Maromak nia mundu foun. (1 Kor 7:29, 31) Hodi hanoin liu atu halo ita-nia serbisu haklaken, ita bele salva ita-nia moris no mós sira neʼebé rona ita.—1 Tim 4:16.