“Matan troka matan” katak sá?
Bíblia nia resposta
Mandamentu “matan troka matan” mak parte husi Maromak nia Ukun-Fuan neʼebé nia fó ba ema Izraél antigu liuhusi Moisés. Jesus mós temi ida-neʼe iha ninia Diskursu iha Foho. (Mateus 5:38, Éxodo 21:24, 25; Deuteronómio 19:21) Neʼe signifika kuandu fó kastigu ba ema ida neʼebé halo sala, kastigu neʼe tenkesér todan hanesan ho krime neʼebé ema neʼe halo.a
Ukun-fuan neʼe aplika ba hahalok neʼebé ema halo ho neon atu hakanek ema seluk. Kona-ba ema neʼebé halo aat ba ema seluk ho neon, Moisés nia Ukun-Fuan hatete: “Ruin troka ruin, matan troka matan, nehan troka nehan, no tenke halo ba nia hanesan buat neʼebé nia halo ona ba ema seluk.”—Levítico 24:20.
Saida mak objetivu husi ukun-fuan “matan troka matan”?
Mandamentu “matan troka matan” la fó lisensa ba ema ida-idak atu selu aat fali ba ema seluk. Maibé, ida-neʼe ajuda juís sira atu fó kastigu neʼebé loos tuir ema ida nia sala, atu nuneʼe kastigu neʼe la todan demais ka la kmaan demais.
Ukun-fuan neʼe mós sai nuʼudar avizu ba ema neʼebé hakarak ka halo planu atu hakanek ema seluk. Moisés nia Ukun-Fuan esplika: “Atu nuneʼe ema seluk [ema sira neʼebé haree ona juís sira halo tuir Maromak nia ukun-fuan] neʼebé rona kona-ba neʼe sei sai taʼuk, no sira sei nunka halo tan buat aat hanesan neʼe iha imi-nia leet.”—Deuteronómio 19:20.
Ukun-fuan “matan troka matan” aplika ba ema Kristaun sira ka lae?
Lae. Ema Kristaun la presiza halo tuir ukun-fuan neʼe. Tanba ukun-fuan neʼe mak parte ba Moisés nia Ukun-Fuan, no Jesus nia sakrifísiu halakon ona Moisés nia Ukun-Fuan.—Roma 10:4.
Maski nuneʼe, ukun-fuan neʼe hatudu sai Jeová nia hanoin. Porezemplu, ida-neʼe hatudu sai katak Maromak hafolin hahalok justisa. (Salmo 89:14) Neʼe mós hatudu sai Jeová nia prinsípiu kona-ba justisa katak ema neʼebé halo sala tenke hetan dixiplina “neʼebé natoon”.—Jeremias 30:11.
Hanoin neʼebé sala kona-ba ukun-fuan “matan troka matan”
Hanoin neʼebé sala: Ukun-fuan “matan troka matan” makaʼas demais.
Hanoin neʼebé loos: Ukun-fuan neʼe la fó lisensa ba juís sira atu tesi-lia iha dalan neʼebé todan demais no makaʼas demais. Maibé bainhira juís sira halo tuir ukun-fuan neʼe iha dalan neʼebé loos, antes sira tesi-lia ba ema neʼebé halo sala, sira sei buka-hatene uluk situasaun neʼebé akontese no mós buka-hatene se ema neʼe halo sala ho neon ka lae. (Éxodo 21:28-30; Números 35:22-25) Ukun-fuan “matan troka matan” ajuda juís atu tesi-lia iha dalan neʼebé la makaʼas liu ka la kmaan liu.
Hanoin neʼebé sala: Ukun-fuan “matan troka matan” katak ema bele selu aat fali ba ema seluk.
Hanoin neʼebé loos: Moisés nia Ukun-Fuan hatete: “Imi labele selu fali hahalok aat ka rai odi ba imi-nia maluk ida iha povu nia leet.” (Levítico 19:18) Duké anima ema atu selu aat fali, Moisés nia Ukun-Fuan anima ema atu tau fiar ba Maromak no juís sira neʼebé Maromak hili ona atu rezolve problema sira.—Deuteronómio 32:35.
a Dala ruma, liafuan lex talionis iha lian Latín bele refere ba prinsípiu neʼe. Ita mós bele hetan prinsípiu neʼe iha nasaun antigu sira seluk nia sistema legál.