Pergunta husi haklaken-naʼin
◼ Ita bele halo saida deʼit atu apoia pioneiru sira?
Iha mundu tomak, ita-nia irmaun-irmán besik naʼin-800.000 serbí nuʼudar pioneiru regulár ka pioneiru tempu-tomak iha tinan serbisu 2009. Sira fó sira-nia tempu, forsa, no uza mós sira-nia osan atu habelar lia-foun diʼak kona-ba Maromak nia Ukun. (Prov 3:9) Klaru katak Maromak Jeová kontente tebes ho sira-nia hakaʼas-an! Entaun, iha dalan saida deʼit mak ita mós bele hatudu katak ita kontente ho sira? No oinsá mak ita bele ajuda sira atu kontinua halaʼo sira-nia knaar ho laran-haksolok?
Dalan ida mak liuhusi ita-nia liafuan, ita bele fó laran-manas ba sira atu kontinua serbí nuʼudar pioneiru. (Prov 25:11) Ita mós bele halo planu atu haklaken hamutuk ho pioneiru sira semana-semana. Kuandu serbisu hamutuk ho sira, karik diʼak atu uza ita-nia karreta ka motór duké sira-nian, ka ajuda hodi fó osan atu selu mikrolét ka taksi. No se ita uza sira-nia karreta ka motór, ita bele ajuda sira enxe mina. (1 Kor 13:5; Flp 2:4) Ita mós bele hatudu laran-luak ba sira no konvida sira hodi han hamutuk.—1 Ped 4:8, 9.
Bíblia promete katak Maromak Jeová sei tau matan ba ninia atan sira neʼebé tau uluk ninia hakarak iha sira-nia moris. (Sal 37:25; Mt 6:33) Dalan ida neʼebé nia halo ida-neʼe mak liuhusi ita maluk kristaun. (1 Joao 3:16-18) Loos duni, pioneiru sira la hein ema seluk atu tau matan ba sira rasik nia responsabilidade kona-ba osan. No sira mós labele fó sai beibeik kona-ba sira-nia susar ekonomia. Maibé ita bele prontu atu “tulun sira-nia kuran” iha dalan oioin hodi haree didiʼak sira-nia situasaun.—2 Kor 8:14, 15.
Iha tempu uluk, kuandu haklaken-naʼin diʼak ida iha kongregasaun Sénkreas naran Febe atu halo viajen ba Roma, apóstolu Paulo fó laran-manas ba irmaun-irmán sira iha Roma, dehan: “Simu nia nuʼudar loloos ba santu sira iha Naʼi, hodi tulun nia kona-ba buat naran deʼit neʼebé nia kuran husi imi.” (Rom 16:1, 2) Ita mós iha oportunidade atu hatudu domin hanesan neʼe iha ita-nia kongregasaun hodi apoia ita-nia maluk sira neʼebé badinas atu haklaken lia-foun diʼak nuʼudar pioneiru regulár no pioneiru tempu-tomak.—Apos 5:42.