Orasaun no hanoin kleʼan mak importante
1. Saida mak ajuda Jesus atu tau uluk serbisu neʼebé importante liu?
1 Iha kalan, Jesus fó isin-diʼak ba ema barak no duni sai anju aat sira husi ema. Kuandu ninia dixípulu hetan nia iha dadeer-saan tuirmai, sira hatete: “Ema hotu buka Ita.” Sira hakarak nia atu kontinua halo milagre sira. Maibé ba Jesus, serbisu neʼebé importante liu mak haklaken lia-foun diʼak. Nia hatán: “Ita bá fatin seluk, iha knua sira besik atu haʼu haklaken mós iha neʼebá, basá tan neʼe mak haʼu mai.” Saida mak ajuda Jesus atu tau uluk serbisu importante neʼe? Nia hadeer sedu atu harohan no hanoin kleʼan. (Mc 1:32-39) Oinsá mak orasaun no hanoin kleʼan mós bele ajuda ita atu haklaken ho laran-manas?
2. Ita bele hanoin kleʼan kona-ba saida deʼit neʼebé ajuda ita atu laran-manas nafatin iha serbisu haklaken?
2 Hanoin kleʼan kona-ba saida deʼit? Jesus haree katak ema “sira kole no neon nakraik, hanesan bibi sira neʼebé bibi-atan la iha”. (Mt 9:36) Hanesan Jesus, ita bele hanoin kona-ba ema no sira-nia presiza atu rona lia-foun diʼak. Ita mós bele hanoin kona-ba tansá mak ita-nia serbisu mak urjente. (1 Kor 7:29) Liután neʼe, ita bele hanoin kleʼan kona-ba Maromak Jeová nia hahalok furak sira, ita-nia knaar espesiál nuʼudar Testemuña ba Jeová, no lia-loos sira neʼebé ita aprende husi Maromak nia Liafuan, neʼebé ema iha ita-nia haklaken-fatin seidauk hatene.—Sal 77:11-13; Isa 43:10-12; Mt 13:52.
3. Bainhira mak tempu diʼak atu hanoin kleʼan?
3 Bainhira mak hanoin kleʼan? Hanesan Jesus, ema balu hadeer sedu hodi uza tempu neʼe atu hanoin kleʼan. Ema seluk hanoin kleʼan iha kalan, antes toba. (Gên 24:63) Maski ita okupadu, ita bele buka tempu atu hanoin kleʼan. Ema balu halo nuneʼe iha bís laran kuandu bá fatin ruma. Ema balu uza tempu han-meiudia atu hanoin kleʼan. Ema barak haree katak hanoin kleʼan ba tempu badak antes hola parte iha serbisu haklaken, ida-neʼe ajuda sira atu haklaken ho laran-manas no aten-brani liután.
4. Tansá mak ita tenke hanoin kleʼan?
4 Hodi halo orasaun no hanoin kleʼan, ida-neʼe sei ajuda ita atu haburas liután ita-nia hakarak atu serbí Maromak Jeová, atu nafatin tau uluk ita-nia adorasaun nuʼudar buat importante liu iha ita-nia moris, no atu hametin ita-nia hakarak atu kontinua haklaken. Hanesan Jesus, Maromak nia atan importante liu, hetan buat diʼak hodi hanoin kleʼan, nuneʼe mós ita.