‘Halo Maromak nia naran sai santu’
1. Saida mak tema ba reuniaun boot ba loron rua ba tinan serbisu nian 2012? No ida-ne’e foti husi ne’ebé?
1 Ita iha knaar espesiál atu lori naran husi Ukun-Na’in Boot Liu Hotu, Jeová! Nia rasik mak hili ita atu uza ninia naran ne’e. Nu’udar Testemuña ba Jeová, ema koñese ita ho Jeová nia naran ne’ebé úniku, ida-ne’e akontese liuliu iha tinan 1931. (Isa 43:10) Maromak nia Oan-Mane mesak, Jesus, hafolin tebes Maromak nia naran, tan ne’e kuandu nia hanorin ninia dixípulu sira kona-ba oinsá atu halo orasaun, nia tau uluk Maromak nia naran. (Mt 6:9) Jesus nia liafuan sira-ne’e mak tema ba ita-nia reuniaun boot ba loron rua ba tinan serbisu nian 2012. Tema ne’e mak: “Halo Maromak nia naran sai santu.”
2. Ita hein namanas atu rona informasaun saida?
2 Saida mak ita sei rona: Iha loron-sábadu, ita sei rona diskursu ho tema: “Fó-hatene Maromak nia naran ba ema seluk hodi serbí nu’udar atan tempu-tomak.” Diskursu ne’e sei ko’alia kona-ba oinsá serbí Maromak tempu-tomak halo ita sente kontente iha ita-nia moris. Ita mós sei rona diskursu tuituir malu ho títulu: “Kuidadu atu la hafo’er Jeová nia naran.” Diskursu ne’e sei ajuda ita atu hasees an husi lasu haat ne’ebé bele hafo’er Maromak nia naran. Iha diskursu ho tema: “Tanbasá presiza halo santu Maromak nia naran?” ita sei hetan resposta ba pergunta rua tuirmai ne’e: Saida mak sei ajuda ita atu haklaken ho laran-manas maski ema ladún interese ba ita-nia mensajen? no Saida mak sei ajuda ita atu hetan rezultadu di’ak iha ita-nia serbisu haklaken? Iha loron-domingu, ita sei rona diskursu haat ne’ebé tuituir malu ne’ebé sei esplika kona-ba oinsá ita bele halo santu Maromak nia naran liuhusi ita-nia hanoin, ko’alia, desizaun no hahalok. Ema foun sira sei hafolin tebes diskursu públiku ho tema: “Jeová sei halo santu ninia naran iha Armagedon.”
3. Ita iha knaar espesiál saida? Oinsá mak programa iha reuniaun boot sei ajuda ita?
3 Lakleur tan, Maromak Jeová sei halo santu ninia naran. (Eze 36:23) Maibé antes tempu ne’e, ita iha knaar espesiál atu apoia buat hotu ne’ebé reprezenta Maromak Jeová nia naran ne’ebé santu. Ami fiar katak programa iha reuniaun boot ba loron rua ne’e sei ajuda ita ida-idak atu kumpre ita-nia responsabilidade importante nu’udar ema ne’ebé lori Maromak nia naran.