Reuniaun boot sira ajuda ita nuʼudar haklaken-naʼin
1. Arranju foun saida mak komesa iha tinan 1938, no tansá?
1 Iha tinan 1938, Maromak Jeová nia organizasaun komesa atu halaʼo arranju foun ida. Iha arranju neʼe, kongregasaun balu halibur hamutuk nuʼudar grupu ida atu tuir reuniaun boot. Tansá halo reuniaun boot? Iha Informant (agora bolu, “Ita-nia Serbisu Reinu nian”) husi fulan-Janeiru, tinan 1939 fó resposta: “Reuniaun boot sira-neʼe mak arranju husi Maromak Jeová nia organizasaun atu ajuda ita halaʼo serbisu ba Maromak. Hanorin neʼebé ita simu iha reuniaun boot sira mak buat neʼebé importante atu ajuda ita ida-idak hodi hatene oinsá halo ita-nia serbisu ho didiʼak.” Tinan-tinan haklaken-naʼin sira aumenta ba beibeik! Iha tinan 1938 iha haklaken-naʼin 58.000, maibé iha tinan 2009 iha haklaken-naʼin 7.000.000 liu. Ida-neʼe hatudu ho klaru katak reuniaun boot ba loron rua ajuda duni ita nuʼudar haklaken-naʼin atu “halo ita-nia serbisu ho didiʼak”!
2. Informasaun saida deʼit mak sei hatoʼo iha ita-nia reuniaun boot ba loron rua iha tinan oinmai?
2 Tema ba tinan oinmai: Ita hotu hein namanas ba reuniaun boot ba loron rua neʼebé sei halaʼo iha tinan oinmai, neʼebé sei fó laran-manas mai ita, loos ka lae? Tema ba reuniaun neʼe mak: “Imi Laʼós Mundu neʼe Nian” neʼebé foti husi Joao 15:19. Diskursu saida deʼit mak sei ajuda ita nuʼudar haklaken-naʼin? Iha loron-sábadu, ita sei rona diskursu kona-ba “Oinsá mak serbí Maromak ba tempu-tomak proteje ita?” Ita mós sei haksolok hodi rona diskursu tolu neʼebé tuituir malu ho tema: “Keta hafoʼer Ita an ho . . .” “Balada”, “Feto-Aat Boot” no “Kontratu-Naʼin”. Iha loron-domingu, ita sei rona diskursu neʼebé tuituir malu ho tema: “Hadomi Maromak Jeová, laʼós mundu neʼe.” Sei iha mós diskursu seluk ho tema, “Kontinua moris hanesan ema estranjeiru iha mundu neʼe” no “Aten-barani bá! Imi bele manán mundu”.
3. Buat diʼak saida deʼit mak ita bele hetan hodi tuir reuniaun boot ba loron rua?
3 Irmán ida ladún laran-manas atu bá haklaken. Maibé, depois nia tuir reuniaun boot ba loron rua, nia hatete katak informasaun neʼebé nia rona halo nia hanoin didiʼak kona-ba ninia situasaun no book nia atu hakaʼas an liután. Agora nia hakarak “bá haklaken no lakohi tan atu buka razaun oioin hodi la bá haklaken!” Ita bele fiar katak informasaun neʼebé ita sei hetan iha reuniaun boot ba loron rua iha tinan oinmai sei ajuda ita hotu atu hadomi Maromak Jeová liu fali mundu. (1 Joao 2:15-17) Mai ita halo planu ho didiʼak atubele tuir reuniaun boot ba loron rua no atu rona didiʼak. Ida-neʼe sei ajuda duni ita nuʼudar haklaken-naʼin!