Reuniaun boot neʼebé ajuda ita atu moris tuir espíritu nafatin
1. Maromak Jeová ajuda ita iha dalan saida atu halaʼo knaar haklaken lia-foun diʼak?
1 Maromak Jeová sempre ajuda ita hodi fó informasaun no treinu neʼebé ita presiza atu halaʼo knaar neʼebé ita simu hodi haklaken lia-foun diʼak. (Mt 24:14; 2 Tim 4:17) Tinan ida dala ida, ita simu ajuda neʼe liuhusi reuniaun boot ba loron rua. Komesa semana 31 Agostu 2009, reuniaun boot ba loron rua sei halaʼo iha mundu tomak ho tema “Moris tuir espíritu nafatin”, neʼebé foti husi Roma 8:5 no Judas 17-19.
2. (a) Ita sei aprende saida deʼit iha reuniaun boot neʼe? (b) Reuniaun boot ba loron rua neʼebé uluk Ita tuir, oinsá mak ajuda Ita atu halaʼo Ita-nia knaar?
2 Ita sei aprende saida: Iha reuniaun boot neʼe, ita sei simu avizu kona-ba perigu sira neʼebé halo ita lakon tempu no halo ita la fó atensaun ba buat neʼebé importante liu. Ita mós sei aprende oinsá mak ita bele sees husi atitude neʼebé la kaer metin ba buat neʼebé loos, no mós sai ema espirituál katak sá. Iha loron-domingu, ita sei rona diskursu neʼebé tuituir malu no aprende oinsá mak ita ida-idak, no mós nuʼudar família, bele laʼo ba oin hodi moris tuir espíritu maski hasoru susar sira neʼebé koko ita-nia fiar. Reuniaun boot neʼe sei ajuda atu proteje ita-nia laran, mantein ita-nia saúde espirituál, no hanoin nafatin kona-ba bensaun sira neʼebé Maromak sei haraik ba ema neʼebé moris tuir espíritu nafatin.
3. Ita-nia reuniaun boot ba loron rua sei halaʼo iha sá data? Ita prepara atu halo saida?
3 Kuandu Ita rona avizu kona-ba data ba reuniaun boot neʼebé sei halaʼo iha Ita-nia área, diʼak se halo planu kedas atubele tuir no fó atensaun didiʼak ba diskursu hotu iha loron rua neʼe. Labele haluha katak Maromak Jeová fó bensaun ba ema neʼebé badinas.—Prov 21:5.
4. Iha reuniaun boot ba loron rua neʼebé sei halaʼo, ita sei simu ajuda atu halo saida?
4 Loos, Maromak Jeová mak arranja reuniaun boot neʼe nuʼudar prezente diʼak ba ita. Nia uza grupu atan laran-metin sira atu prepara informasaun neʼebé kona ita-nia situasaun no ajuda atu halaʼo ita-nia knaar nuʼudar ema kristaun. Ita fó-agradese ba Maromak Jeová, tanba nia ho domin fó buat hotu neʼebé ita presiza atu haklaken ita-nia “esperansa neʼebé ita iha hodi la namlele”.—Ebr 10:23-25; Tgo 1:17.