Proteje bá Ita-nia neon
1. Saida mak tema ba reuniaun boot ba loron rua iha tinan serbisu nian 2013? Programa neʼe nia objetivu mak saida?
1 Jesus haruka ninia dixípulu sira atu hadomi Maromak Jeová ho sira-nia neon, laran, no moris tomak. (Mt 22:37, 38) Grupu Administradór organiza reuniaun boot ba loron tolu, loron rua, no loron ida iha tinan neʼe hodi ajuda ita atu hanoin didiʼak kona-ba ita mak ema oinsá iha laran. Karik ita sei hanoin-hetan tema ba reuniaun boot ba loron tolu, neʼe mak “Proteje bá ó-nia Laran”. Tema ba reuniaun boot ba loron ida iha tinan serbisu nian 2013 mak “Proteje bá Ita-nia Konxiénsia”. No tema ba reuniaun boot ba loron rua neʼebé sei hahú halaʼo iha fulan oinmai mak “Proteje bá Ita-nia Neon”, neʼebé foti husi Mateus 22:37. Programa neʼe sei ajuda ita ida-idak atu tau atensaun ba buat neʼebé ita hanoin hodi ita bele halo Maromak Jeová kontente.
2. Durante programa, ita sei buka resposta ba pergunta saida deʼit?
2 Saida deʼit mak ita sei rona: Nuʼudar ita rona programa, buka toʼok resposta ba pergunta tuirmai neʼe tanba buat sira-neʼe mak pontu importante husi reuniaun boot ba loron rua.
• Oinsá mak ita bele iha Maromak nia hanoin laʼós ema nian?
• Oinsá mak ita bele ajuda atu hasai hena neʼebé taka ema fiar-laek nia hanoin?
• Ita hakarak atu iha hanoin saida?
• Kuandu ita haburas toman atu hanoin kleʼan, oinsá mak ida-neʼe bele ajuda ita?
• Oinsá mak ita bele husik Jeová atu hadiʼa dalan neʼebé ita hanoin?
• Oinsá mak laʼen, feen, inan-aman no oan sira bele hola parte atu halo moris família nian kontente liu?
• Oinsá mak ita bele prepara an ba Maromak Jeová nia loron?
• Halo ita-nia hanoin prontu ba ita-nia knaar, katak sá?
• Sira neʼebé halo tuir buat neʼebé sira aprende sei hetan buat diʼak saida?
3. Tanbasá mak importante atu tuir programa hotu, rona didiʼak, no halo tuir buat neʼebé ita aprende?
3 Satanás buka dalan oioin atu hafoʼer ita-nia hanoin. (2 Kor 11:3, MF) Tan neʼe, ita tenke proteje ita-nia neon no kontrola ita-nia hanoin. Ita presiza kontinua atu iha hanoin hanesan Kristu no luta hasoru buat aat hotu iha mundu neʼe. (1 Kor 2:16) Nuneʼe, halo planu hodi bele tuir programa hotu iha reuniaun boot ba loron rua, no rona didiʼak ba diskursu sira. Kuandu ita halo tuir matadalan sira neʼebé sei hatoʼo iha reuniaun boot, neʼe sei ajuda ita atu halo ita-nia hanoin prontu atu halaʼo ita-nia serbisu haklaken ho laran-manas.—1 Ped 1:13, MF.