Maromak nia Liafuan mak diʼak atu hanorin
1. Saida mak tema ba reuniaun boot ba loron rua iha tinan serbisu nian 2014? Ita sei hetan resposta ba pergunta saida?
1 Ita-nia “Mestre Boot” Maromak Jeová mak mestre neʼebé diʼak liu hotu. (Isa 30:20, 21) Maibé, iha dalan saida deʼit mak Jeová hanorin ita? Nia fó mai ita livru ida neʼebé diʼak liu hotu livru sira seluk. Neʼe mak ninia Liafuan, Bíblia. Oinsá mak Maromak nia hanorin bele ajuda ita-nia moris kona-ba ita-nia an, hanoin, sentimentu, no iha dalan espirituál? Ita sei hetan resposta ba pergunta neʼe iha reuniaun boot ba loron rua iha tinan serbisu nian 2014. Tema ba programa neʼe mak “Maromak nia Liafuan mak diʼak atu hanorin” neʼebé foti husi 2 Timoteo 3:16.
2. Pergunta saida deʼit mak sei ajuda ita atu hetan resposta ba pontu importante husi programa neʼe?
2 Koko atu hetan pontu importante sira-neʼe: Resposta ba pergunta sira tuirmai neʼe sei ajuda ita atu hetan pontu importante husi programa neʼe:
• Iha dalan saida deʼit mak Maromak nia hanorin ajuda iha ita-nia moris? (Isa 48:17, 18)
• Se ita troka buat ruma iha ita-nia moris hodi bele serbí Jeová tempu-tomak, bensaun saida deʼit mak nia sei fó mai ita? (Mal 3:10)
• Ita presiza halo saida bainhira ita rona “hanorin oioin”? (Ebr 13:9)
• Oinsá mak ita bele banati-tuir “dalan neʼebé [Jesus] hanorin”? (Mt 7:28, 29)
• Tanbasá sira neʼebé iha knaar atu hanorin iha kongregasaun presiza hanorin uluk sira-nia an rasik? (Rom 2:21)
• Oinsá mak Maromak nia Liafuan bele ajuda ita? (2 Tim 3:16)
• Hodi “doko” nasaun sira, oinsá mak ida-neʼe kona ema nia moris? (Ageu 2:6, 7)
• Maromak Jeová fiar katak ita bele halo saida? (Ef 5:1)
• Tanbasá mak ita presiza hakaʼas an atu nafatin tuir Jeová nia hanorin? (Lc 13:24)
3. Tanbasá mak importante duni mai ita atu tuir no rona didiʼak ba programa neʼebé prepara ona ba tempu neʼebé loloos?
3 Iha 2 Timoteo kapítulu 3, antes apóstolu Paulo hakerek liafuan neʼebé ita uza nuʼudar tema ba programa ba reuniaun boot neʼe, nia temi susar oioin neʼebé sei akontese iha loron ikus sira. Nia dehan: “Ema aat no bosok-teen sira sei laʼo husi aat ba aat liu, hodi bosok ema seluk no mós sira-nia an.” (2 Tim 3:13) Hodi la monu ba lia-bosok sira-neʼe, importante duni mai ita atu rona no halo tuir Maromak nia hanorin! Tan neʼe, mai ita hakaʼas an atu tuir no rona didiʼak ba programa neʼebé prepara ona ba tempu neʼebé loloos.