Ai-han “iha tempu loloos”
1. Oinsá mak reuniaun boot ba loron ida neʼebé Ita foin tuir ajuda Ita no ema seluk?
1 Dala barak, depois ita tuir reuniaun boot ba loron ida, ita hatete: “Ida-neʼe mak buat neʼebé haʼu presiza duni!” Irmaun neʼebé iha knaar atu vizita kongregasaun sira konta katak depois rona tiha ba programa iha reuniaun boot ba loron ida, irmaun balu hatete katak agora sira hakarak aumenta tempu neʼebé sira uza atu haklaken. Irmaun ida seluk neʼebé vizita kongregasaun sira hatete: “Reuniaun boot ajuda ita atu hanoin momoos katak ita moris iha loron ikus no atu haree didiʼak kona-ba desizaun sira neʼebé ita halo iha ita-nia moris.” Katuas ida seluk tan hatete: “Haklaken-naʼin balu dehan katak informasaun neʼebé sira rona fó-hanoin sira kona-ba buat neʼebé importante liu, neʼe mak serbisu haklaken.” Oinsá mak reuniaun boot ba loron ida ajuda Ita?
2. Iha reuniaun boot ba loron ida, ita sei rona informasaun saida deʼit?
2 Programa iha reuniaun boot ba loron ida iha tinan serbisu nian neʼe mós iha informasaun neʼebé ita presiza duni. Tema ba reuniaun boot neʼe mak “Buka Protesaun husi Naʼi Jeová” neʼebé foti husi Salmo 118:8, 9. Informasaun balu neʼebé ita sei rona inklui: “Maromak Jeová bele sai hanesan uma neʼebé seguru iha tempu susar”, “Ajuda ema seluk hetan protesaun iha Maromak Jeová nia liras okos”, “Banati-tuir Maromak Jeová hodi fó protesaun ba ema seluk”, “Joven sira, tau fiar tomak ba Aman Jeová!” no “Hodi haraik paraízu espirituál, Maromak Jeová proteje ita”.
3. Oinsá mak ita bele hetan buat diʼak husi reuniaun boot ba loron ida?
3 Buat diʼak neʼebé ita sei hetan: Bainhira rona data ba reuniaun boot ba loron ida, halo planu didiʼak atu tuir, no konvida Ita-nia estudante Bíblia atu bá hamutuk ho Ita. Atu ita bele fó buat diʼak no “laran-metin”, ita presiza “rai didiʼak” buat neʼebé ita rona. (Lc 8:15) Tan neʼe, rona didiʼak ba informasaun. Hakerek nota badak kona-ba pontu importante sira no kona-ba buat neʼebé Ita hakarak halo tuir iha Ita-nia moris no iha serbisu haklaken. Depois reuniaun boot hotu tiha, uza tempu uitoan atu koʼalia hamutuk nuʼudar família kona-ba buat neʼebé Ita rona, no kona-ba oinsá loos mak Ita no Ita-nia família bele halo tuir.
4. Tansá mak ita hein namanas ita-nia reuniaun boot ba loron ida?
4 Reuniaun boot ba loron ida ba tinan neʼe, prepara tiha ona ho domin, hanesan ai-han neʼebé gostu tebes. Nuneʼe, ami hein katak Maromak Jeová haraik ninia bensaun ba Ita nuʼudar Ita hakaʼas an atu tuir reuniaun boot neʼe no atu hetan buat diʼak husi ai-han “iha tempu loloos”. Ida-neʼe sei hametin duni Ita nuʼudar haklaken-naʼin.—Mt 24:45.