Programa foun ba reuniaun boot ba loron ida
Ita sei iha reuniaun boot ba loron ida iha tinan serbisu nian 2009, neʼebé hahú husi Setembru 2008 toʼo Agostu 2009, ho tema neʼebé foti husi Koloso 4:17: “Kaer Didiʼak Knaar neʼebé Ó Simu iha Naʼi, . . . Halaʼo nia Didiʼak”. Nuʼudar ema kristaun, ita hakarak duni halo tuir konsellu neʼe. Hanesan Jesus, ita hakarak ho laran-metin atu halaʼo ita-nia serbisu ba Maromak. (Joao 17:4) Apóstolu Paulo mós hatudu ezemplu kona-ba halaʼo knaar ka serbisu ba Maromak ho diʼak. Nia laran-metin atu halo ramata ninia knaar neʼebé nia simu husi Naʼi Jesus.—Apos 20:24.
Katuas neʼebé iha knaar atu vizita kongregasaun sira sei koʼalia kona-ba oinsá mak haklaken-naʼin balu sei halaʼo sira-nia knaar maski hasoru susar oioin. Tuirmai diskursu ho tema “Haburas buat neʼebé Ita kuda ona” sei hatudu oinsá mak ita bele ajuda “sira hotu neʼebé Maromak fihir ona atu simu moris rohan-laek”. (Apos 13:48) Katuas neʼebé mai husi sukursál sei hatoʼo ninia diskursu primeiru ho tema “Oinsá mak ita hatudu katak ita mak Maromak nia atan sira” hodi esplika kona-ba versíkulu ida-idak husi 2 Korinto 6:1-10. Iha lokraik, nia sei hatoʼo diskursu ida tan ho tema “Hafolin Ita-nia serbisu ba Maromak”. Ami mós fiar katak imi sei sente laran-ksolok hodi rona diskursu ho tema “Ferik-katuas no foin-saʼe haksolok ho serbisu ba Maromak” no “Foin-saʼe sira neʼebé halaʼo didiʼak serbisu ba Maromak”. Sira neʼebé hakarak atu hatudu sira-nia dedikasaun hodi hetan batizmu iha reuniaun boot ida tuirmai, tenke fó-hatene kedas ba katuas koordenadór. Parte importante ida iha ita-nia reuniaun boot sira mak diskursu husi Menara Pengawal (A Sentinela). Entaun, halo favór lori imi-nia Menara Pengawal ba reuniaun boot neʼe.
Atu halaʼo didiʼak ita-nia serbisu ba Maromak, ita presiza hakaʼas an atu la husik ita-nia hakarak rasik no atividade ruma atu hapara ita hodi halaʼo serbisu neʼebé Maromak Jeová entrega ona mai ita. Iha reuniaun boot ida-neʼe sei ajuda ita atu hatene saida mak ita presiza halo atu nafatin tau uluk serbisu ba Maromak. No mós sei ajuda ita atu hanoin didiʼak kona-ba buat hotu neʼebé iha relasaun ho ita-nia serbisu ba Maromak, hodi nuneʼe ita bele halaʼo ida-neʼe ho diʼak liután.