Reuniaun boot ba loron ida ba tinan 2010
1. (a) Reuniaun boot ba loron ida husi tinan hirak liubá iha tema saida deʼit? (b) Oinsá mak reuniaun boot ba loron ida neʼebé uluk Ita tuir ajuda Ita atu halaʼo serbisu haklaken?
1 “Sai riku ho hahalok diʼak”, “Haree didiʼak oinsá imi rona”, “Mantein Ita-nia matan simples”, “Ita mak rai-mean—Maromak Jeová mak ita-nia badain sanan-rai”. (1 Tim 6:18; Lc 8:18; Mt 6:22; Isa 64:8) Liafuan sira-neʼe mak tema husi reuniaun boot ba loron ida neʼebé uluk ita halaʼo. Ita hakarak tuir reuniaun boot ba loron ida neʼebé sei halaʼo iha tinan 2010 ka lae? Tema ba reuniaun boot neʼe mak: “Tempu badak liu ona”, neʼebé foti husi 1 Korinto 7:29.
2. Ita bele halo saida deʼit atu prepara an ba reuniaun boot neʼe?
2 Kuandu kongregasaun fó avizu kona-ba data ba reuniaun boot neʼe, diʼak atu prepara kedas no koʼalia ho laran-manas kona-ba reuniaun espesiál neʼe. Inan-aman balu ajuda oan sira hodi tau marka iha kalendáriu no halo lista kona-ba livru no buat seluseluk neʼebé sira sei lori ba reuniaun-fatin. Sira mós sura loron hira tan mak sei iha toʼo asiste reuniaun boot. Kuandu halo Adorasaun Família nian, diʼak mós atu koʼalia kona-ba nota neʼebé ita hakerek kuandu tuir reuniaun boot iha tinan uluk. Ita-nia família mós bele prepara an ba reuniaun neʼe hodi lee pájina 13-16 husi livru Memperoleh Manfaat dari Pendidikan Sekolah Pelayanan Teokratis. Hodi halo nuneʼe, ita sei ‘haree didiʼak oinsá ita rona’.—Lc 8:18.
3. Oinsá mak ita bele hetan ajuda husi reuniaun boot ba tempu kleur?
3 Halo tuir buat neʼebé ita aprende: Kuandu reuniaun boot hotu tiha, dala barak ita hatete: “Reuniaun neʼe kapás!” Neʼe loos, tanba reuniaun neʼe bensaun ida husi Aman Jeová. (Prov 10:22) Maibé atu reuniaun boot neʼe bele ajuda ita ba tempu kleur, ita presiza hanoin didiʼak no uza informasaun neʼe. (Lc 8:15) Iha dalan atu fila ba uma depois reuniaun, ita bele koʼalia ho ita-nia família ka irmaun sira kona-ba buat neʼebé ita rona. Koʼalia kona-ba ita-nia planu espirituál no mós kona-ba informasaun neʼebé diʼak atu uza iha serbisu haklaken. Se halo nuneʼe, informasaun neʼebé ita rona sei ajuda ita ba tempu kleur.—Tgo 1:25.
4. Tansá mak reuniaun boot ba loron ida hanesan prezente diʼak husi Maromak?
4 Ita sente kontente kuandu ita simu prezente, liuliu se prezente neʼe mak buat neʼebé ita presiza duni. Ita mós hein atu simu prezente espirituál husi Maromak Jeová iha reuniaun boot ba loron ida, loos ka lae? Ita fiar katak Aman Jeová sei fó informasaun neʼebé diʼak ba ita-nia moris loron-loron nian, no fó laran-manas no treinu ba ita atu halaʼo serbisu haklaken.—2 Tim 4:2; Tgo 1:17.