Programa foun ba reuniaun boot ba loron rua
Oinsá mak ita bele hamriik metin kuandu ema koko makaʼas atu hapara ita-nia adorasaun neʼebé loos? Oinsá mak ita bele manán Satanás neʼebé koko makaʼas atu dada ita atu fila fali ba mundu aat neʼebé la tuir Maromak nia hakarak? Ita sei hetan resposta ba pergunta importante hirak-neʼe iha reuniaun boot ba loron rua iha tinan serbisu nian 2009, neʼebé hahú husi Setembru 2008 toʼo Agostu 2009. Tema ba reuniaun neʼe mak “Kontinua atu ‘Manán Buat Aat ho Buat neʼebé Diʼak’”. (Rom 12:21) Mai ita haree kona-ba diskursu balu neʼebé sei hatoʼo iha reuniaun boot neʼe.
Katuas distritu sei hatoʼo diskursu ho tema “Hetan forsa atu manán buat aat ho buat neʼebé diʼak”, “Kuidadu atu labele fiar an demais!”, “Buat aat hotu nia rohan atu besik ona!”, no “Hametin ita-nia fiar atu manán mundu aat neʼe”. Katuas neʼebé iha knaar atu vizita kongregasaun sira sei hatoʼo diskursu ho tema “Agora mak tempu atu hadeer hela!”, neʼebé foti husi Roma 13:11-13, no mós diskursu ho tema “Keta laran-tun iha tempu neʼebé susar”, neʼebé foti husi Provérbios 24:10. Ita mós sei haksolok hodi rona diskursu ho tema “Tau atensaun ba kongregasaun sira-nia presiza”. Diskursu ida seluk neʼebé sei halo ita laran-manas mak diskursu ho tema “Ita bele ‘serbí duni’ hodi halaʼo serbisu nuʼudar pioneiru ka lae?” Iha mós programa rua atu rona diskursu neʼebé tuituir malu. Ida primeiru iha tema “Hamriik metin hasoru Diabu nia babeur aat hotu”. Programa neʼe sei ajuda ita atu hatene oinsá mak Diabu bele lohi ita hodi uza teknolojia, halimar oioin, no edukasaun, no esplika oinsá mak ita bele hasoru babeur hirak-neʼe. Programa ida seluk sei iha tema “Hetan forsa atu tahan iha loron aat neʼe”, no hatudu oinsá mak ita bele halo tuir Maromak nia matadalan neʼebé hakerek iha Efeso 6:10-18.
Dalan importante ida atu manán buat aat mak haklaken mensajen Reinu nian. (Apok 12:17) Tan neʼe, ita la hakfodak katak Satanás hakaʼas an nafatin atu ataka Testemuña ba Jeová! (Isa 43:10, 12) Maibé Satanás sei la konsege manán ita, tanba ita laran-metin atu kontinua “manán buat aat ho buat neʼebé diʼak”. Entaun, halo planu nanis atu tuir programa hotu no aprende didiʼak husi reuniaun boot neʼe.