Hafolin ita-nia knaar atu haklaken
1. Oinsá mak ema barak nia hanoin kona-ba ita-nia serbisu haklaken?
1 Ema barak iha mundu neʼe haree ita-nia serbisu haklaken nuʼudar buat neʼebé “beik”. (1 Kor 1:18-21) Tan neʼe, se ita la kuidadu, ema nia hanoin sala neʼe bele halo ita sai laran-tun no hamenus ita-nia laran-manas. (Prov 24:10; Isa 5:20) Entaun razaun saida mak hatudu katak ita-nia knaar nuʼudar Testemuña ba Jeová mak buat neʼebé espesiál?—Isa 43:10.
2. Tanbasá haklaken mak nuʼudar “serbisu santu”?
2 “Serbisu santu”: Apóstolu Paulo hatete katak ita-nia knaar atu haklaken mak “serbisu santu”. (Roma 15:15, 16, MF) Tanbasá? Razaun mak kuandu ita haklaken ita sai nuʼudar ‘maluk serbisu-naʼin’ ho Ida neʼebé Santu, no mós liuhusi serbisu haklaken ita hola parte atu halo santu Maromak nia naran. (1 Kor 3:9; 1 Ped 1:15) Maromak Jeová haree ita-nia serbisu haklaken nuʼudar ‘sakrifísiu hahiʼi nian’ ba nia. Tan neʼe haklaken mak parte importante iha ita-nia adorasaun ba Maromak.—Ebr 13:15.
3. Tanbasá mak serbisu haklaken mak buat neʼebé espesiál?
3 Serbisu haklaken mak buat neʼebé espesiál no ema balu deʼit mak simu knaar neʼe. Tuir loloos, anju sira iha lalehan mós hakarak tebes atu halo serbisu neʼe no klaru katak sira bele halo serbisu neʼe ho didiʼak. (1 Ped 1:12) Maski nuneʼe, Maromak hili ema sala-naʼin neʼebé hanesan “sanan-rai”, atu halo serbisu espesiál neʼe.—2 Kor 4:7.
4. Oinsá mak ita hatudu katak ita hafolin ita-nia serbisu haklaken?
4 Buat neʼebé importante: Tanba ita hafolin tebes ita-nia knaar atu haklaken, ita haree ida-neʼe nuʼudar buat neʼebé “diʼak liu” no importante liu iha ita-nia moris. (Flp 1:10) Tan neʼe, ita hakaʼas an atu halo programa hodi hola parte beibeik iha serbisu neʼe semana-semana. Hanesan tokadór ida sempre hakaʼas an atu aumenta liután ninia matenek atu toka no mós prepara didiʼak kuandu nia hakarak atu halo konser. Nuneʼe mós ita hakarak hakaʼas an atu prepara nanis antes haklaken, hodi nuneʼe ita bele haklaken “lia-menon lia-loos nian” ho didiʼak, no bele aumenta ita-nia matenek atu “hanorin”.—2 Tim 2:15; 4:2.
5. Sé mak hafolin ita-nia serbisu?
5 Importante atu la husik ema nia hanoin neʼebé laloos kona-ba serbisu haklaken halo ita sente laran-tun. Hanoin-hetan katak ema balu iha ita-nia haklaken-fatin gosta simu mensajen neʼebé ita haklaken. Liután neʼe, keta haluha katak ita la buka atu halo kontente ema deʼit. Buat neʼebé importante liu mak Maromak Jeová kontente ho ita-nia serbisu no nia hafolin tebes ida-neʼe.—Isa 52:7.