Labele dada an
1. Ita presiza aten-brani atu halo saida? Tansá?
1 Dala ruma Ita sente dada an atu haklaken iha eskola tanba taʼuk Ita-nia kolega sei goza Ita ka lae? Ita presiza duni aten-brani atu koʼalia, liuliu se Ita ema neʼebé moedór. Saida mak bele ajuda Ita?
2. Oinsá mak Ita bele tetu didiʼak kuandu haklaken iha eskola?
2 Tetu didiʼak: Maski eskola mak fatin neʼebé diʼak tebes atu lta haklaken, maibé neʼe la dehan katak Ita tenke koʼalia ba ema hotu hanesan Ita haklaken uma ba uma. Tetu didiʼak kona-ba bainhira mak tempu neʼebé diʼak atu haklaken. (Ecle 3:1, 7) Se klase koʼalia hamutuk kona-ba tópiku ruma, ka hetan knaar ruma atu hatoʼo informasaun iha klase, neʼe fó oportunidade diʼak ba Ita atu koʼalia kona-ba Ita-nia fiar. Ka, estudante ida husu tansá Ita la hola parte iha atividade ruma iha eskola. Kuandu hahú tinan foun eskola, ema kristaun balu fó-hatene ba mestre sira katak sira mak Testemuña ba Jeová no fó livru sira-neʼebé esplika ita-nia fiar. Joven balu mós rai ita-nia livru sira iha meza hodi book estudante sira atu husu pergunta.
3. Oinsá mak Ita bele prepara atu haklaken iha eskola?
3 Prepara antes: Se Ita halo nuneʼe, neʼe sei ajuda Ita sai brani atu koʼalia. (1 Ped 3:15) Nuneʼe, hanoin uluk pergunta sira-neʼebé karik sira sei husu ba Ita, no hanoin oinsá Ita bele hatán pergunta sira-neʼe. (Prov 15:28) Se bele, rai iha eskola Ita-nia Bíblia no livru balu hanesan Bertukar Pikiran, Pertanyaan Kaum Muda, no livru seluk kona-ba kriasaun, neʼebé Ita bele uza se presiza. Husu inan-aman atu treinu iha adorasaun família nian kona-ba haklaken iha eskola.
4. Tansá mak Ita tenke kontinua haklaken iha eskola?
4 Hanoin pozitivu: Labele hanoin katak Ita-nia kolega eskola sei sempre goza kuandu Ita koʼalia kona-ba lia-loos. Karik balu gaba Ita tanba brani atu koʼalia no sira mós rona Ita. Maibé keta laran-tun se ema ida la rona. Maromak Jeová sei sente kontente tanba Ita koko atu haklaken. (Ebr 13:15, 16) Kontinua husu nia atu ajuda Ita ‘nafatin haklaken ho aten-brani’. (Apos 4:29; 2 Tim 1:7, 8) Hanoin toʼok se ema ida rona, Ita sei sente kontente tebes. Karik ikusmai ema neʼe sai Maromak Jeová nia atan ida!