Haburas toman diʼak sei lori bensaun
1. Tanbasá mak diʼak atu haree fali ita-nia toman kona-ba serbí Maromak?
1 Kuandu ita foin sai ema kristaun ida, ita hakaʼas an atu haburas toman diʼak sira hanesan estuda Bíblia, tuir reuniaun sira, haklaken no halo orasaun. Hodi halo buat sira-neʼe, Maromak Jeová haraik bensaun ba ita no ita bele iha relasaun diʼak ho nia. Maibé agora karik ita hetan ona batizmu ba tinan balu. Se nuneʼe, ita sei iha toman diʼak sira neʼebé ita haburas ona kuandu ita sai ema kristaun ka lae?
2. Hodi lee Bíblia loroloron, ida-neʼe lori buat diʼak saida?
2 Haree fali ita-nia toman: Ita iha toman atu lee parte balu husi Maromak nia Liafuan loroloron ka lae? Ita sei hetan bensaun barak hodi halo nuneʼe! (Jos 1:8; Sal 1:2, 3) Iha Israel nia tempu, liurai ida-idak tenke lee Moisés nia Ukun-Fuan neʼebé sira rasik hakerek tuir fali, no sira tenke lee ida-neʼe “durante [sira-nia] moris tomak”. Neʼe lori bensaun saida? Ida-neʼe ajuda sira atu haraik an no aprende atu hamtaʼuk Jeová atu nuneʼe sira labele laʼo sees husi Jeová nia mandamentu sira. (Deut 17:18-20) Nuneʼe mós ho ohin loron, lee Bíblia bele ajuda ita atu nafatin la halo sala iha mundu aat neʼe. Ida-neʼe mós ajuda ita atu bele sai matenek hodi haklaken.—Flp 2:15; 2 Tim 3:17.
3. Bensaun saida mak ita sei hetan hodi tuir reuniaun beibeik?
3 Jesus iha toman atu bá sinagoga, tanba iha sinagoga mak ema koʼalia kona-ba eskritura. (Lc 4:16) Ita bele fiar katak ida-neʼe fó forsa ba nia atu tahan hasoru susar sira neʼebé sei kona nia. Ita mós bele hetan forsa hodi simu hanorin sira iha reuniaun kongregasaun nian no mós ransu ho maluk sira hodi “hametin malu”. (Rom 1:12) Halibur hamutuk ho ita-nia maluk kristaun sira ajuda ita atu tahan hasoru susar iha loron ikus sira-neʼe. (Ebr 10:24, 25) Ita sei iha toman atu tuir reuniaun hotu ka lae?
4. Tanbasá mak diʼak ba ita atu haklaken semana-semana?
4 Bíblia hatudu katak apóstolu sira hola parte atu haklaken lia-foun diʼak “loron-loron iha templu no iha uma ba uma”. (Apos 5:42) Maski karik ita la iha tempu atu haklaken loroloron, maibé ita iha toman atu haklaken semana-semana ka lae? Hodi halo nuneʼe, ita sei sai matenek atu uza Maromak nia Liafuan, no ita sei haksolok hodi fahe lia-loos ba ema seluk.
5. Tanbasá importante atu halo orasaun beibeik ba Jeová?
5 Profeta Daniel hetan bensaun barak tanba nia serbí Jeová hodi “tuir ninia toman” iha nia moris tomak. Ida-neʼe inklui ninia toman atu halo orasaun ba Jeová beibeik. (Dan 6:10, 16, 20) Nuneʼe mós, kuandu ita halo orasaun beibeik ba Jeová ho ita-nia laran tomak, nia sei haraik mai ita ninia espíritu santu. (Lc 11:9-13) Liután neʼe, Jeová sei hatán ita-nia orasaun hodi hakbesik liután ba ita, no ita bele iha oportunidade atu iha relasaun neʼebé metin ho nia. (Sal 25:14; Tgo 4:8) Neʼe mak bensaun neʼebé boot tebes! Tan neʼe, mai ita hakaʼas an atu iha toman hodi adora Maromak Jeová no ita sei simu bensaun barak husi nia.