“Moris iha dame laran ho ema hotu-hotu”
1. Bíblia nia matadalan ida-neʼebé mak ita tenke halo tuir kuandu ita hasoru uma-naʼin neʼebé hirus?
1 Maromak Jeová nia povu hadomi dame, no ita-nia serbisu haklaken mak serbisu dame nian. (Isa 52:7) Maibé, dala ruma ita hasoru ema neʼebé sai hirus kuandu ita vizita sira iha sira-nia uma. Entaun, saida mak bele ajuda ita atu buka dame iha situasaun hanesan neʼe?—Rom 12:18.
2. Tanbasá mak importante ba ita atu uza matenek?
2 Uza matenek: Maski ema balu sai hirus tebes tanba sira lakohi lia-loos, maibé karik ema balu tan hirus tanba situasaun seluk neʼebé la kona ita-nia mensajen. Karik ita vizita iha tempu neʼebé ladún diʼak ba sira. Karik uma-naʼin sente ladún diʼak tanba ninia problema rasik. Maski uma-naʼin ida hirus tanba lia-foun diʼak, ita tenke hanoin-hetan katak nia hatán hanesan neʼe tanba nia rona informasaun neʼebé sala kona-ba ita. (2 Kor 4:4) Hodi uza matenek, ida-neʼe bele ajuda ita atu nafatin kalma no la hanoin katak uma-naʼin hirus ita.—Prov 19:11.
3. Oinsá mak ita bele hatudu respeitu ba uma-naʼin?
3 Hatudu respeitu: Klaru katak ema barak iha ita-nia haklaken-fatin kaer metin ona ba fiar oioin. (2 Kor 10:4) Sira iha direitu atu hili se sira hakarak rona ba ita ka lae. Tan neʼe, diʼak atu la hatún uma-naʼin nia fiar ka halo sira sente katak sira la iha folin tanba ita mak hatene liu Bíblia. Se uma-naʼin husu ita atu sai, diʼak atu halo tuir ida-neʼe ho respeitu.
4. Koʼalia ho laran-diʼak katak sá?
4 Koʼalia ho laran-diʼak: Maski ema koʼalia aat ita, maibé ita tenke hatán ho laran-diʼak. (Kol 4:6; 1 Ped 2:23) Duké buka razaun atu diskute malu, diʼak atu koko koʼalia kona-ba buat neʼebé uma-naʼin mós fiar. Karik ho laran-diʼak ita bele husu kona-ba razaun tansá mak uma-naʼin la simu ita. Maibé atu la halo nia hirus liután, dala ruma diʼak atu la kontinua koʼalia ho nia.—Prov 9:7; 17:14.
5. Buat diʼak saida deʼit mak ita bele hetan tanba ita buka dame iha serbisu haklaken?
5 Se ita buka dame, karik uma-naʼin bele hanoin-hetan nafatin ita-nia hahalok neʼe no bele rona ba haklaken-naʼin seluk neʼebé fó sasin ba nia. (Rom 12:20, 21) Maski ema neʼe haree hanesan kaer metin deʼit ba ninia ideia, maibé loron ida karik nia sai ita-nia maluk kristaun. (Gal 1:13, 14) Maski nia sei simu lia-loos ka lae, maibé ita sei fó hahiʼi ba Jeová no halo furak ita-nia serbisu hanorin se ita nafatin kontrola an no buka dame.—2 Kor 6:3.