Banati-tuir profeta sira—Jonas
1. Jonas hatudu hahalok diʼak saida deʼit?
1 Saida mak ita hanoin-hetan kona-ba profeta Jonas? Ema balu haree nia nuʼudar ema neʼebé taʼuk-teen ka laran-toos. Maski nuneʼe, ita hatene katak nia hatudu haraik-an, aten-brani, no la hanoin an deʼit. Oinsá mak ita bele banati-tuir Jonas nia hahalok diʼak sira-neʼe?—Tgo 5:10.
2. Oinsá mak ita bele banati-tuir Jonas nia ezemplu kona-ba haraik-an?
2 Haraik-an: Kuandu Maromak fó knaar ba Jonas atu haklaken iha sidade Nínive, Jonas halai hodi bá fatin seluk. Ita la hakfodak kona-ba neʼe tanba ema Asíria sira toman atu halo violénsia, no ema bolu Nínive nuʼudar “sidade raan nian”. (Naum 3:1-3) Maski nuneʼe, kuandu Maromak Jeová fó dixiplina ba Jonas, nia hatudu haraik-an hodi simu knaar neʼebé Jeová fó ba nia. (Prov 24:32; Jonas 3:1-3) Maski foufoun Jonas halai husi ninia knaar, maibé ikusmai nia halo duni Jeová nia hakarak. (Mt 21:28-31) Ita bele banati-tuir Jonas ka lae, hodi prontu atu haklaken liafuan diʼak maski ita hetan dixiplina ka ita-nia haklaken-fatin mak susar?
3. Iha situasaun saida deʼit mak ita bele hatudu aten-brani no la hanoin an deʼit iha serbisu haklaken?
3 Aten-brani no la hanoin an deʼit: Jonas nia desizaun sala neʼe lori perigu ba ró-naʼin sira, maibé Jonas prontu atu lakon ninia moris hodi bele salva sira. (Jonas 1:3, 4, 12) Tuirmai, kuandu Jonas halaʼo ninia knaar iha Nínive, nia laʼo toʼo sidade klaran. Karik nia halo nuneʼe hodi buka fatin diʼak atu fó sai Maromak Jeová nia mensajen tesi-lia nian. Ida-neʼe hatudu katak Jonas laʼós taʼuk-teen, maibé Maromak nia profeta neʼebé aten-brani! (Jonas 3:3, 4) Oinsá ho ita ohin loron? Ita mós presiza Maromak atu fó aten-brani mai ita hodi bele haklaken nafatin maski ema kontra ita. (Apos 4:29, 31) No ita presiza hatudu katak ita la hanoin an deʼit, hodi prontu atu uza ita-nia tempu no rikusoin iha serbisu haklaken.—Apos 20:24.
4. Tanbasá mak ita tenke uza tempu hodi hanoin kleʼan kona-ba ezemplu diʼak husi Jeová nia profeta sira?
4 Kuandu ita lee istória kona-ba Jeová nia profeta sira iha tempu uluk, ita bele hetan buat diʼak se ita tau ita-nia an iha sira-nia fatin no situasaun. Bele husu ita-nia an: ‘Haʼu sei simu knaar neʼebé Maromak fó mai haʼu ka lae? Oinsá mak haʼu bele banati-tuir profeta neʼe nia hahalok diʼak iha haʼu-nia moris?’ (Ebr 6:11, 12) Iha futuru, iha Ita-nia Serbisu Kristaun, sei koʼalia tan kona-ba lisaun diʼak neʼebé ita bele aprende husi Maromak Jeová nia profeta seluk neʼebé laran-metin.