Saida mak book ita atu haklaken?
1. Domin ba sé mak book ita atu haklaken?
1 Ohin loron haklaken kona-ba Maromak nia Ukun mak serbisu neʼebé diʼak liu hotu. Hodi haklaken, ita hatudu katak ita halo tuir mandamentu rua neʼebé boot liu, neʼe mak atu hadomi Jeová no hadomi ita-nia maluk. (Mc 12:29-31) Domin mak iha kbiit boot neʼebé bele book ita atu haklaken ho laran-manas.—1 Joao 5:3.
2. Oinsá mak ita hatudu katak ita hadomi Jeová liuhusi ita-nia serbisu haklaken?
2 Domin ba Jeová: Maromak Jeová mak ita-nia Belun neʼebé diʼak liu hotu, no tanba domin ba nia, neʼe book ita atu defende nia. Maizumenus ba tinan 6.000, Satanás koʼalia bosok kona-ba Maromak. (2 Kor 4:3, 4) Tanba ida-neʼe, ohin loron ema fiar katak Maromak fó terus ba ema iha infernu, no fiar katak nia mak Trindade, no hanoin katak nia la iha interese ba ema. Ema barak mós fiar katak Maromak la iha. Ita hakarak tebes atu ema bele hatene lia-loos kona-ba ita-nia Aman iha lalehan. Ita-nia hakaʼas an atu haklaken halo nia kontente tebes no halo Satanás hirus.—Prov 27:11; Ebr 13:15, 16.
3. Oinsá mak ita hatudu katak ita hadomi ema liuhusi ita-nia serbisu haklaken?
3 Domin ba ema seluk: Kuandu ita haklaken ba ema, ita hatudu katak ita hadomi sira. Durante loron ikus sira-neʼe, ema presiza duni atu rona liafuan diʼak. Ohin loron, ema barak hanesan ema Nínive iha Jonas nia tempu neʼebé “la hatene entre sira-nia liman loos no liman karuk”. (Jonas 4:11) Ita-nia serbisu haklaken hanorin ema atu iha moris neʼebé diʼak no kontente. (Isa 48:17-19) Hodi haklaken, ita fó esperansa ba ema. (Rom 15:4) Se sira rona no halo tuir buat neʼebé sira aprende, sira mós bele hetan salvasaun.—Rom 10:13, 14.
4. Maromak Jeová sei nunka haluha saida?
4 Labarik sira la hatudu katak sira hadomi sira-nia inan-aman iha loron neʼebé sira hili deʼit, maibé sira hakaʼas an atu sempre hadomi sira-nia inan-aman. Hanesan neʼe mós, domin boot ba Maromak sei book ita atu buka oportunidade atu fó sasin iha tempu hotu, laʼós deʼit iha loron neʼebé ita hili atu bá haklaken. Ita sei kontinua haklaken nafatin. (Apos 5:42) Se ita hatudu domin hanesan neʼe, Maromak Jeová sei nunka haluha ida-neʼe.—Ebr 6:10.