Ita prontu atu halo mudansa ka lae?
1. Tanba buat barak iha mundu neʼe troka beibeik, ita presiza halo mudansa saida deʼit?
1 Tanba buat barak iha mundu neʼe troka beibeik, dala ruma ita mós presiza halo mudansa kona-ba dalan neʼebé ita haklaken, kona-ba buat neʼebé ita koʼalia ba ema, ka kona-ba ita-nia programa haklaken nian. Ita prontu atu halo mudansa hanesan neʼe ka lae?
2. Tanbasá mak ita presiza halo mudansa hodi ita bele laʼo ba oin hamutuk ho Jeová nia organizasaun?
2 Dalan neʼebé ita haklaken: Kongregasaun kristaun sempre prontu atu halo mudansa. Foufoun, kuandu Jesus haruka ninia dixípulu sira atu haklaken, nia hatete ba sira atu labele lori ai-han ka osan. (Mt 10:9, 10) Maibé, ikusmai Jesus troka ninia matadalan neʼe tanba nia hatene nanis katak ema sei la hatudu laran-diʼak ba ninia dixípulu sira no katak serbisu haklaken sei aumenta ba fatin oioin. (Lc 22:36) Iha tinan atus ida liu nia laran, Maromak Jeová nia organizasaun uza dalan oioin atu haklaken. Porezemplu, iha tempu uluk sira uza kartaun hodi lee mensajen, rádiu, no karreta ho koluna neʼebé hasai lian boot. Sira uza dalan oioin tuir ema nia presiza iha tempu neʼebá. Ohin loron, tanba susar atu hetan ema iha uma, ita-nia organizasaun fó laran-manas mai ita atu haklaken mós iha fatin públiku no iha dalan la formál. No mós, fó laran-manas mai ita atu haklaken husi uma ba uma iha rai-nakaras hodi bele fó sasin ba sira neʼebé serbisu iha loron. Ita laʼo ba oin hamutuk ho Jeová nia organizasaun neʼebé hanesan kuda-karreta nuʼudar nia muda ninia dalan ka lae?—Eze 1:20, 21.
3. Oinsá mak halo mudansa hodi koʼalia tuir uma-naʼin nia presiza bele ajuda ita atu haklaken diʼak liután?
3 Buat neʼebé atu koʼalia: Ema iha ita-nia haklaken-fatin hanoin barak kona-ba saida? Karik sira hanoin kona-ba ekonomia, família, ka funu. Diʼak atu hatene kona-ba problema ka situasaun neʼebé ema barak hasoru daudauk hodi bele prepara liafuan ruma neʼebé ita bele uza tuir sira-nia presiza. (1 Kor 9:20-23) Maski ita prepara ona buat neʼebé ita atu koʼalia, maibé kuandu uma-naʼin fó sai ninia hanoin, diʼak atu halo mudansa hodi koʼalia tuir buat neʼebé uma-naʼin presiza.
4. Tanbasá mak importante atu ita halo mudansa kona-ba dalan neʼebé ita haklaken?
4 Lakleur tan, “mundu neʼe nuʼudar ohin sei mohu”, no terus boot sei hahú. Sin, “tempu badak liu ona”. (1 Kor 7:29, 31) Tan neʼe, importante tebes atu ita la demora halo mudansa kona-ba dalan neʼebé ita haklaken hodi bele uza ho didiʼak tempu badak neʼebé sei iha!