Aumenta ita-nia matenek iha serbisu haklaken—Oinsá atu hatudu interese

Tanbasá importante: Jesus hatudu interese no domin ba ema ida-idak. Porezemplu, bainhira nia kura ema tilun-diuk ida, nia bele sente katak ema neʼe moe ka sente an uitoan, entaun nia lori ema neʼe dook tiha husi ema barak nia oin no kura nia mesamesak deʼit. (Marcos 7:31-35) Nia mós komprende katak ninia dixípulu sira mós iha fraku, entaun nia fó informasaun natoon deʼit ba sira hodi sira bele rai. (João 16:12) Bainhira saʼe tiha ba lalehan mós, Jesus hatudu nafatin interese ba ema iha rai. (2 Timóteo 4:17) Sai ema kristaun ida, ita mós hakarak banati-tuir Jesus nia ain-fatin. (1 Pedro 2:21; 1 João 3:16, 18) Laʼós neʼe deʼit. Tanba se ita hatudu interese ba uma-naʼin, hanoin kona-ba ninia situasaun, nia interese ba saida, nia hasoru daudaun problema saida, neʼe bele fó rezultadu diʼak ba ita-nia haklaken. Se uma-naʼin mak sente katak ita iha interese ba nia no laʼós mai atu haklaken deʼit ka lori livru deʼit, karik nia mós hakarak rona ba ita.

Oinsá atu halo ida-neʼe:

• Prepara didiʼak. Baibain tiha deʼit, no hatudu oin-midar.

• Matan-moris. Haree toʼok uma-naʼin neʼe iha oan ka lae? Nia gosta kintál moos ka nia gosta hakiak animál? Nia iha fiar ka lae? Se ita haree buat sira-neʼe, neʼe ajuda ita atu koʼalia saida ho uma-naʼin neʼe.

• Husu uma-naʼin nia hanoin ruma, no rona didiʼak toʼok nia atu koʼalia saida, labele korta nia. Fó atensaun tomak bainhira nia koʼalia hela. Fó obrigadu ba nia tanba fó sai ninia hanoin sira. Labele diskute ho nia.

• Koʼalia tuir buat neʼebé mak uma-naʼin hakarak, maski ita prepara ona tópiku seluk. Lalika taʼuk. Se uma-naʼin hakarak koʼalia kona-ba tópiku ida neʼebé ita seidauk prepara, uza ita-nia tratu, broxura, ka revista sira. Tópiku sira-neʼe hotu iha laran. Se uma-naʼin tempu laiha, fó-hatene ba nia katak ita komprende no koʼalia badak deʼit.

Koko ida-neʼe durante fulan neʼe:

• Iha adorasaun família nian ka bainhira sai ba haklaken, pratika toʼok oinsá bele koʼalia tuir fali tópiku neʼebé mak uma-naʼin hakarak atu koʼalia, maski ita prepara ona ida seluk atu koʼalia ho nia.

• Bainhira dirije hela grupu haklaken, irmaun neʼe bele koʼalia uitoan ka halo drama ida oinsá mak bele hatudu interese ba uma-naʼin.