“Hadiʼa an nafatin atu halo hahalok diʼak”
1 Kuandu Jesus komesa atu halaʼo serbisu haklaken hamutuk ho ninia dixípulu sira, nia uza tempu atu prepara sira ba serbisu ida-neʼe. (Mt 10:5-14) Maski ita hotu iha buat barak atu halo, diʼak atu uza minutu balu atu prepara ita-nia an antes haklaken uma ba uma, ida-neʼe sei ajuda ita atu hetan, ka “koʼa”, buat neʼebé diʼak iha serbisu neʼe.—2 Kor 9:6.
2 Oinsá atu prepara: Preparasaun neʼebé diʼak komesa husi hatene didiʼak informasaun iha livru sira neʼebé ita hakarak atu fahe ba ema. Presiza mós atu hanoin kona-ba ema neʼebé iha ita-nia haklaken-fatin. Ema barak hanoin kona-ba problema saida? Sira iha relijiaun saida? Ita bele buka informasaun husi Ita-nia Serbisu Reinu nian no Bertukar Pikiran mengenai Ayat-Ayat Alkitab nuʼudar ezemplu kona-ba oinsá mak ita bele koʼalia ho ema sira neʼebé ita sei hasoru.
3 Rona didiʼak drama kiʼik iha Reuniaun Serbisu mós sei ajuda ita. Kuandu ita iha esperiénsia barak ona, ita sei la presiza tempu barak atu halo preparasaun. Maibé, se ita uza nafatin tempu uitoan antes haklaken atu hanoin kona-ba buat neʼebé ita sei koʼalia no buka nafatin atu hadiʼa ita-nia koʼalia, ita sei sai matenek liután atu haklaken ba ema. No mós, ita tenke haree fali ita-nia pasta atu hatene katak ita iha duni livru hotu neʼebé ita presiza.
4 Atu la haluha liafuan neʼebé ita sei hatoʼo ba ema, saida deʼit mak ita bele halo? Dalan ida mak pratika nanis liafuan neʼebé mak ita sei hatoʼo ba uma-naʼin. Balu gosta atu pratika durante estudu família nian. Balu seluk hakerek iha surat-tahan kiʼikoan pontu balu neʼebé importante atu koʼalia ba ema no haree fali antes atu tuku odamatan.
5 Tansá diʼak: Se ita prepara didiʼak ita bele sai matenek liután no kontente liután iha ita-nia serbisu haklaken. Ida-neʼe ajuda ita atu la taʼuk no la nakdedar kuandu hasoru ema. Ida-neʼe mós ajuda ita atu tau atensaun ba uma-naʼin duké hanoin deʼit kona-ba buat neʼebé ita atu koʼalia. No mós, se ita hatene didiʼak informasaun iha livru laran, ida-neʼe sei ajuda ita atu sai laran-manas liután atu fahe livru sira-neʼe ba ema.
6 Bíblia fó laran-manas mai ita atu “hadiʼa an nafatin atu halo hahalok diʼak”. (Tito 3:1) Serbisu seluk saida mak diʼak liu, se kompara ho serbisu atu haklaken lia-foun diʼak? Hodi nafatin prepara an didiʼak, ita hatudu respeitu ba uma-naʼin neʼebé hakarak rona, no mós ba Maromak Jeová neʼebé haruka ita atu halaʼo serbisu neʼe.—Isa 43:10.