Aumenta ita-nia matenek iha serbisu haklaken—Prepara fraze ruma atu komesa koʼalia
Tanbasá importante: Se fraze neʼebé ita uza atu komesa koʼalia la dada uma-naʼin nia atensaun, karik nia sei la gosta atu koʼalia ho ita no hanetik ita atu fó sasin ba nia. Tan neʼe, fraze neʼebé ita uza atu komesa koʼalia mak parte importante ba informasaun neʼebé ita atu fó-sai. Maski ita bele hetan sujestaun ruma iha Ita-nia Serbisu Kristaun no livru Bertukar Pikiran, baibain sujestaun sira-neʼe la hakerek ho kompletu, hodi halo fasil ba ita atu uza tuir situasaun oioin. No maski sujestaun balu hakerek ho kompletu, maibé haklaken-naʼin bele troka liafuan ruma ka sira bele prepara sira-nia sujestaun rasik. Hodi halo nuneʼe, ita bele haklaken diʼak liután se ita prepara uluk fraze ruma neʼebé ita sei uza atu komesa koʼalia, duké koʼalia tuir buat neʼebé mosu derrepente deʼit iha ita-nia neon kuandu foin hasoru uma-naʼin.—Provérbios (Amsal) 15:28.
Oinsá atu halo ida-neʼe:
• Hili tópiku ida. Diʼak atu hili tópiku neʼebé fó-sai iha livru neʼebé ita fahe daudaun no ema barak iha ita-nia haklaken-fatin sei gosta atu lee.
• Prepara ho didiʼak fraze ruma neʼebé ita sei uza depois ita foin hasé uma-naʼin. Karik ita bele komesa hodi dehan: “Haʼu mai tanba . . . ,” ka, “Ema barak hanoin tebes kona-ba . . . ,” ka, ita bele dehan, “Tuir Ita-nia hanoin . . . ,” ka liafuan sira seluk hanesan neʼe. Diʼak atu uza fraze neʼebé badak no simples. Haklaken-naʼin balu hili atu dekór fraze ruma neʼebé sira hanoin atu uza.
• Prepara pergunta ida neʼebé bele dada uma-naʼin nia atensaun hodi book nia atu koʼalia ho ita. (Mateus 17:25) Klaru katak foin antes ita hasoru nia karik nia hanoin hela kona-ba buat ruma, tan neʼe diʼak atu la husu pergunta neʼebé difisil ba nia ka halo nia sente moe atu hatán.
Koko ida-neʼe durante fulan neʼe:
• Uza tempu uitoan durante adorasaun família nian atu prepara no halo treinu kona-ba fraze ruma neʼebé ita sei uza atu komesa koʼalia ho uma-naʼin.
• Kuandu hola parte iha serbisu haklaken, diʼak atu fahe ba haklaken-naʼin sira seluk fraze neʼebé ita prepara ona atu uza. (Provérbios [Amsal] 27:17) Troka fraze neʼe se ida-neʼe la dada uma-naʼin nia atensaun.