Prepara liafuan atu hahú koʼalia—oinsá?
1. Tanbasá mak importante atu hili didiʼak liafuan atu hahú koʼalia?
1 Hanesan ai-han neʼebé gostu bele halo ita atu hakarak han tan, nuneʼe mós ho ita-nia liafuan sira. Liafuan neʼebé ita uza atu hahú koʼalia bele dada ema atu hakarak koʼalia kona-ba Maromak. Maski liafuan atu hahú koʼalia bele naruk, badak, ka kona-ba buat oioin, maibé hanesan ho ai-han neʼebé gostu, ita presiza hanoin uluk no prepara didiʼak. (Provérbios [Amsal] 15:28) Maibé, liafuan saida mak bele book ema?
2. Oinsá mak ita bele prepara ita-nia liafuan hodi dada ema nia interese?
2 Hili tópiku neʼebé ema gosta: Ita-nia liafuan atu hahú koʼalia tenke dada ema nia interese, selae, sira sei lakohi tan atu koʼalia. Entaun, kuandu ita prepara, hanoin didiʼak saida mak kona ema nia moris iha ita-nia área. Ema hanoin ka lae, kona-ba governu neʼebé diʼak, família neʼebé kontente, ka oinsá atu halakon funu? Baibain, ema gosta atu fó sai sira-nia opiniaun, entaun prepara pergunta neʼebé sei book sira atu fó sai sira-nia hanoin. Ita bele uza ezemplu kona-ba oinsá atu haklaken ba ema husi Ita-nia Serbisu Kristaun no troka liafuan uitoan atu uza iha ita-nia haklaken-fatin. Dala ruma, ita mós bele treinu kuandu halaʼo Adorasaun Família nian.
3. Oinsá mak ita bele troka ita-nia liafuan hodi hanoin ema nia kultura ka situasaun?
3 Hanoin ema nia kultura no situasaun: Iha rai balu, ita presiza koʼalia kedas kona-ba tanbasá ita vizita. Maibé iha fatin seluk ita presiza hatudu respeitu hodi kumprimentu sira no husu uluk kona-ba sira-nia família no fó sai informasaun kona-ba ita-nia an rasik. Iha rai balu, tanba ema iha ona fiar, sira kontente kuandu ita koʼalia kedas kona-ba Bíblia. (Apostolu 2:14-17) Maibé, iha fatin neʼebé ema nia relijiaun laʼós kristaun, ka ema la iha relijiaun, karik diʼak liu atu la koʼalia kedas kona-ba Bíblia maibé hein toʼo ita vizita fali sira.—Apostolu 17:22-31.
4. Tanbasá mak ita-nia liafuan primeiru mak importante?
4 Liafuan primeiru: Prepara ita-nia liafuan primeiru ho kuidadu. Diʼak liu koʼalia liafuan uitoan deʼit neʼebé simples. Dalan neʼebé ita koʼalia liafuan primeiru mak importante. Koʼalia ho laran-manas. Hatudu oin-midar hodi hatudu katak ita hanoin uma-naʼin. Hodi halo tuir matadalan sira-neʼe sei ajuda ita atu prepara liafuan sira neʼebé book ema iha ita-nia haklaken-fatin atu hakarak han husi “Jeová nia meza”.—1 Korinto 10:21, MF.