Uza Aprende kona-ba Maromak nia Liafuan—Hodi hahú koʼalia ho ema
1. Ita iha ajuda saida tan neʼebé bele uza ba haklaken?
1 Iha reuniaun boot foin daudauk neʼe, ita simu livru oan ida naran Aprende kona-ba Maromak nia Liafuan. Oinsá mak ita bele uza livru neʼe atu prepara ba serbisu haklaken? Tanba livru neʼe halibur eskritura sira hamutuk tuir tópiku ida-idak hanesan ho livru Bertukar Pikiran nian, entaun neʼe diʼak tebes atu uza hodi hahú koʼalia ho ema.
2. Oinsá mak ita bele uza Aprende kona-ba Maromak nia Liafuan iha serbisu haklaken?
2 Karik ita bele uza pergunta 8 no husu: “Ami mai atu vizita lalais deʼit. Ema barak husu hanesan neʼe: ‘Terus neʼebé ema hetan mai husi Maromak ka lae?’ [Iha fatin haklaken balu, karik diʼak liu hatudu pergunta neʼe ba uma-naʼin.] Ita-nia hanoin mak saida? [Hein ba resposta.] Bíblia fó resposta neʼebé klaru tebes ba pergunta neʼe.” Loke Bíblia hodi lee no koʼalia uitoan kona-ba eskritura ida ka rua neʼebé hakerek tiha ona iha parte neʼe. Se uma-naʼin hatudu interese ba informasaun neʼe, hatudu tan pergunta 20 hotu husi livru Aprende kona-ba Maromak nia Liafuan no husu nia atu hili ida hodi ita bele koʼalia hamutuk loron seluk. Se lae ita mós bele fó livru ida neʼebé ita uza ba estuda ho ema, neʼebé liga ho tópiku neʼebé ita koʼalia daudauk.
3. Oinsá mak ita bele uza Aprende kona-ba Maromak nia Liafuan atu hahú koʼalia ho ema neʼebé mak laʼós ema kristaun?
3 Se ema iha ita-nia haklaken fatin mak laʼós ema kristaun, karik diʼak atu uza pergunta 4, no 13 toʼo 17. Porezemplu, ita bele uza informasaun husi pergunta 17 hodi husu: “Ohin ami halo vizita badak ba família hotu. Tuir Ita-nia hanoin, família barak mak hasoru hela susar iha sira-nia moris ka lae? [Hein ba resposta.] Kaben-naʼin barak sente liafuan diʼak neʼe ajuda tebes sira: “Feen tenke hatudu respeitu kleʼan ba ninia laʼen.” [La presiza hatete katak liafuan sira-neʼe husi Éfeso 5:33. Se uma-naʼin mak feto ida, karik diʼak atu temi liafuan husi Éfeso 5:28.] Tuir Ita-nia hanoin, sujestaun neʼe bele ajuda moris kaben nian ka lae?”
4. Bainhira atu remata koʼalia ho ema neʼebé laʼós kristaun, ita bele halo saida?
4 Bainhira atu remata ona, halo arranju hodi bele koʼalia tan ho uma-naʼin. Karik ita bele halo planu atu koʼalia kona-ba eskritura ida husi pergunta neʼebé ita uza ba koʼalia ho nia. Se tempu diʼak, fó-hatene ba uma-naʼin katak liafuan ohin ita uza hodi koʼalia ho nia, tuir loloos mai husi Bíblia. Fó livru ida neʼebé ita hanoin sei diʼak ba uma-naʼin neʼe. Neʼe haree ba uluk ita koʼalia kona-ba tópiku saida no ema neʼe fiar Bíblia ka lae.—Haree p. 3-6 husi Ita-nia Serbisu Kristaun, fulan-Dezembru 2013.