Irmaun klosan sira, imi hakaʼas an atu hetan knaar iha kongregasaun ka lae?
1. Bainhira mak irmaun klosan ida bele halo tuir liafuan neʼebé hakerek iha 1 Timoteo 3:1?
1 “Se mane ida hakaʼas an atu hetan knaar . . . iha kongregasaun, nia hakarak halo serbisu neʼebé diʼak loos.” (1 Tim 3:1, MF) Liafuan sira-neʼe husi Bíblia fó laran-manas ba irmaun sira atu hakaʼas an kumpre kritériu sira hodi bele hetan knaar iha kongregasaun. Ita tenke hein toʼo sai boot ona mak foin hetan knaar ka lae? Tuir loloos, diʼak atu hakaʼas an kuandu ita sei joven hela. Hodi nuneʼe ita bele iha tempu barak atu simu treinu ruma no hatudu katak ita kumpre ona kritériu ruma hodi bele hetan knaar nuʼudar atan ba kongregasaun bainhira ita sai boot. (1 Tim 3:10) Se ita mak irmaun klosan ida neʼebé hetan ona batizmu, oinsá mak ita bele hakaʼas an atu hetan knaar iha kongregasaun?
2. Oinsá mak ita bele haburas hakarak atu fó ita-nia an hodi ajuda maluk sira? Ita bele halo saida hodi hatudu hahalok neʼe?
2 Fó ita-nia an: Hanoin-hetan katak ita hakaʼas an atu hetan knaar ruma, laʼós kona-ba hetan naran-boot. Tan neʼe, haburas hakarak atu ajuda ita-nia irmaun-irmán sira. Atu ajuda ita halo nuneʼe, hanoin kleʼan kona-ba Jesus nia ezemplu. (Mt 20:28; Joao 4:6, 7; 13:4, 5) Husu Jeová atu ajuda ita hatudu interese ba ita-nia maluk sira. (1 Kor 10:24) Porezemplu, ita bele halo buat ruma atu ajuda sira neʼebé idade ona ka moras iha ita-nia kongregasaun ka lae? Ita sai prontu atu fó ita-nia tempu hodi halo limpeza ka tau matan ba Reuniaun-Fatin ka lae? Ita prontu atu hatoʼo diskursu iha Eskola Serbisu Kristaun nian se irmaun ida la bele halaʼo ninia parte ka lae? Se ita prontu nafatin atu ajuda ita-nia maluk sira, ida-neʼe sei halo ita sente kontente liu.—Apos 20:35.
3. Tanbasá mak importante atu iha relasaun diʼak ho Maromak, no oinsá mak ita bele haburas relasaun diʼak neʼe?
3 Iha relasaun diʼak ho Maromak: Importante tebes ba atan ba kongregasaun atu iha relasaun diʼak ho Maromak, duké iha deʼit matenek ka jeitu oioin. Irmaun neʼebé iha relasaun diʼak ho Jeová hakaʼas an nafatin atu haree buat hotu tuir Jeová no Jesus nia haree. (1 Kor 2:15, 16) Nia mós hatudu hahalok sira “neʼebé espíritu lori mai”. (Gal 5:22, 23) Nia mak haklaken-naʼin ida neʼebé tau uluk Maromak nia Ukun. (Mt 6:33) Atu iha relasaun diʼak ho Maromak, ita mós presiza iha toman diʼak atu estuda mesak. Ida-neʼe inklui lee Bíblia loron-loron, lee Livru Haklaken no Matan-moris bá! ho kompletu, no mós prepara no tuir reuniaun sira. (Sal 1:1, 2; Ebr 10:24, 25) Kuandu apóstolu Paulo fó laran-manas ba Timóteo neʼebé sei joven atu laʼo ba oin iha dalan espirituál, nia hatete: “Haree didiʼak . . . ó-nia hanorin.” (1 Tim 4:15, 16) Tan neʼe, hakaʼas an atu prepara didiʼak diskursu sira neʼebé ita sei hatoʼo iha Eskola Serbisu Kristaun. Prepara didiʼak ba serbisu haklaken no hola parte beibeik. Halo planu atu laʼo ba oin no hakaʼas an atu kumpre planu sira-neʼe, hanesan sai nuʼudar pioneiru ida, ka serbí iha Betel, ka tuir Eskola Bíblia nian ba Irmaun sira neʼebé Laiha Kaben. Hodi iha relasaun diʼak ho Maromak, ida-neʼe sei ajuda ita atu ‘keta husik ita-nia hakarak foin-saʼe nian ukun ita’.—2 Tim 2:22.
4. Tanbasá mak importante ba irmaun ida atu iha hahalok neʼebé ita bele tau fiar no laran-metin?
4 Bele tau fiar no laran-metin: Iha apóstolu sira-nia tempu, irmaun sira neʼebé hetan knaar atu fahe ai-han ba maluk sira neʼebé presiza ajuda, sira mak irmaun neʼebé “iha naran diʼak”, tan neʼe apóstolu sira tau fiar ba irmaun sira-neʼe katak sira sei laran-metin atu halaʼo sira-nia knaar. Ida-neʼe fó tempu ba apóstolu sira atu tau atensaun ba buat sira neʼebé importante liu. (Apos 6:1-4, MF) Tan neʼe, bainhira ita hetan knaar ida iha kongregasaun, hakaʼas an atu halo didiʼak knaar neʼe tuir ita-nia kbiit no matenek. Banati-tuir Noé nia ezemplu neʼebé halo tuir buat hotu neʼebé Maromak haruka kona-ba halo arka. (Gên 6:22) Jeová hafolin tebes hahalok laran-metin no hahalok neʼe hatudu katak irmaun ida laʼo ba oin iha dalan espirituál.—1 Kor 4:2; haree kaixa ho títulu “Hetan buat diʼak tanba simu treinu”.
5. Tanbasá mak diʼak ba irmaun klosan sira atu hakaʼas an atu hetan knaar iha kongregasaun?
5 Hanesan Bíblia fó-hatene nanis, ohin loron Jeová halibur lalais ninia povu. (Isa 60:22) Tinan-tinan, maizumenus ema naʼin-250.000 hetan batizmu. Tanba ema foun barak tama lia-loos, ida-neʼe hatudu katak ita presiza duni irmaun sira neʼebé kumpre ona kritériu sira atu hetan knaar iha kongregasaun. Loos duni, ohin loron ita iha buat barak atu halo iha Jeová nia serbisu. (1 Kor 15:58) Entaun, irmaun klosan sira, imi hakaʼas an atu hetan knaar iha kongregasaun ka lae? Se nuneʼe, ida-neʼe hatudu katak imi hakarak halo serbisu neʼebé diʼak loos!
[Dezeñu iha pájina 2]
Tanba ema foun barak tama lia-loos, ida-neʼe hatudu katak ita presiza duni irmaun sira neʼebé kumpre ona kritériu sira atu hetan knaar iha kongregasaun
[Dezeñu iha pájina 3]
Hetan buat diʼak tanba simu treinu
Irmaun klosan sira neʼebé hatudu ezemplu diʼak bele aprende buat barak bainhira katuas sira fó knaar no mós fó treinu ba sira. Porezemplu, loron ida depois reuniaun ramata, katuas área nian tuur hela iha plataforma no fó laran-manas ba haklaken-naʼin ida. Nia haree joven mane ida hamriik besik no husu se joven neʼe hakarak atu koʼalia ho nia. Joven neʼe hatete katak nia hetan knaar atu hamoos plataforma depois reuniaun ramata. Ninia inan-aman prontu atu fila ba uma, maibé joven neʼe lakohi bá antes nia kumpre ninia knaar. Ho laran-diʼak, katuas área nian sai husi plataforma. Katuas área nian dehan: “Katuas sira iha kongregasaun neʼe sempre buka dalan oioin atu fó treinu ba irmaun klosan sira hodi fó knaar ba sira. Tan neʼe, bainhira haʼu vizita kongregasaun neʼe, haʼu la hakfodak kuandu katuas sira husu sei irmaun klosan ida bele hetan knaar nuʼudar atan ba kongregasaun.”