Pergunta husi haklaken-naʼin

◼ Se irmán ida mak estuda Bíblia ho ema neʼebé nia bá vizita fali no haklaken-naʼin mane mak akompaña, irmán neʼe tenke taka ninia ulun ho hena ruma ka lae?

Kuandu irmán ida mak dirije estudu Bíblia neʼebé metin ona no haklaken-naʼin mane mak akompaña nia, nia tenkesér taka ulun. (1 Korinto 11:3-10) Iha livru Menara Pengawal, 15 Jullu 2002, pájina 27 hatete: “Neʼe mak arranju ka estudu neʼebé ita halaʼo hodi hanorin ema. Iha situasaun hanesan neʼe, estudu neʼe mak parte husi arranju kongregasaun nian. Se irmán neʼebé hetan ona batizmu mak dirije estudu no irmaun neʼebé batizmu ona mós iha, irmán neʼe sei taka ninia ulun ho hena ka xapeu.” Ita presiza halo tuir matadalan neʼe maski halaʼo estudu neʼe iha uma laran, iha uma oin, ka iha situasaun seluk.

Maibé oinsá se irmán ida hamutuk ho haklaken-naʼin mane bá vizita ema neʼebé seidauk sai estudante Bíblia? Iha situasaun neʼe, nia la presiza taka ulun maski objetivu ba vizita fali mak atu komesa estuda Bíblia ka koʼalia informasaun husi ita-nia livru sira. Baibain ema neʼebé ita bá vizita sai estudante Bíblia neineik-neineik, tan neʼe irmaun-irmán sira presiza hanoin didiʼak kona-ba situasaun no uza matenek atu deside bainhira loos mak presiza taka ulun.