Koko atu estuda Bíblia ho ema neʼebé simu beibeik ita-nia revista
1. Jeová nia organizasaun fó laran-manas ba haklaken-naʼin sira atu halo saida? Tanbasá?
1 Maski ema barak hakarak lee ita-nia revista sira, maibé dala ruma sira lakohi atu estuda Bíblia ho ita. Tan neʼe, ba tempu kleur ona, Jeová nia organizasaun fó laran-manas ba haklaken-naʼin sira atu vizita ema sira hanesan neʼe kada fulan hodi fahe revista ba sira. Nuʼudar ema sira-neʼe lee beibeik ita-nia revista sira, dala barak sira-nia hakarak atu aprende kona-ba Maromak nia Liafuan sai buras liután. (1 Pedro 2:2) Ikusmai, buat neʼebé sira lee karik bele book sira atu hakarak estuda Bíblia ho ita.
2. Oinsá mak ita bele rega fini lia-loos nian iha ema nia laran?
2 ‘Rega’ fini lia-loos nian: Duké vizita lalais deʼit hodi fó revista sira, hakaʼas an atu koʼalia ho uma-naʼin no haburas relasaun diʼak ho sira. Ida-neʼe sei ajuda ita atu hatene sira-nia situasaun, buat neʼebé sira gosta, no sira-nia fiar, no neʼe bele ajuda ita atu koʼalia kona-ba buat neʼebé book sira-nia laran. (Provérbios [Amsal] 16:23) Prepara antes ita bá vizita fali ema. Se bele, hatudu sai pontu ruma no eskritura ruma husi ita-nia revista sira, ho ida-neʼe ita bele rega fini lia-loos nian iha sira-nia laran. (1 Korinto 3:6) Hakerek data ida-idak neʼebé ita vizita ema ruma, no hakerek livru neʼebé ita fahe, no mós hakerek informasaun ka eskritura neʼebé ita koʼalia ho ema neʼe.
3. Dala hira mak ita tenke vizita ema neʼebé simu beibeik ita-nia revista sira?
3 Ita tenke vizita dala hira? Ita tenke vizita ema neʼebé gosta simu ita-nia revista sira fulan ida dala ida. Maibé, se ita iha tempu no mós ema neʼe iha interese, ita bele vizita sira dala balu iha fulan ida. Porezemplu, liutiha semana ida ka rua husi tempu neʼebé ita fó revista ba sira, ita bele vizita fali sira no dehan: “Ohin haʼu hakarak vizita Ita lalais deʼit atu koʼalia kona-ba informasaun ruma husi revista neʼebé haʼu fó ona ba Ita.” Ida-neʼe sei haburas liután ema neʼe nia hakarak atu lee informasaun ruma. Se nia lee tiha ona, ita bele husu ninia hanoin kona-ba informasaun neʼe no koʼalia hamutuk. Ka se ema ida gosta atu lee ita-nia livru sira, karik ita bele vizita fali nia hodi fahe tratu, broxura, ka livru neʼebé ita fahe iha fulan neʼe.
4. Saida mak ita bele halo atu hatene se ema neʼebé simu ita-nia revista iha hakarak atu estuda Bíblia?
4 Keta hein toʼo uma-naʼin mak husu ita atu estuda Bíblia ho sira. Diʼak atu ita mak husu uluk sira. Maski uluk sira lakohi atu estuda Bíblia, maibé ita bele kontinua hatudu ba sira informasaun husi ita-nia Livru Haklaken ho tema “Resposta ba pergunta sira kona-ba Bíblia” no haree toʼok se nia hakarak atu koʼalia kona-ba neʼe ho ita ka lae. Karik ita bele hahú estuda badak. Maibé, se ita la bele hahú estuda Bíblia, ita bele kontinua deʼit atu lori revista atu fó ba sira no ida-neʼe bele haburas sira-nia hakarak ba lia-loos.