Modelu kapás ba tratu foun sira!
1. Saida mak iha modelu foun neʼebé ita uza iha serbisu haklaken?
1 Iha fulan-Novembru liubá ita simu tratu ho títulu: “Ema neʼebé mate ona bele moris filafali ka lae?” Liután neʼe, ita simu tan tratu foun lima iha reuniaun boot ba loron tolu ho tema: “Maromak nia Liafuan mak Lia-loos!” Tratu neen neʼe iha modelu foun neʼebé kapás. Tanbasá tratu sira-neʼe iha modelu foun? No oinsá mak ita bele uza didiʼak tratu sira-neʼe iha serbisu haklaken?
2. Tanbasá mak tratu sira-neʼe iha modelu foun?
2 Tanbasá modelu foun?: Baibain, ita hetan rezultadu diʼak iha serbisu haklaken kuandu ita halo tuir hakat haat neʼe: (1) Hahú hodi husu pergunta atu hatene uma-naʼin nia hanoin. (2) Lee eskritura ida. (3) Fó buat ruma ba uma-naʼin atu lee. (4) Husik hela pergunta ba nia no halo planu atu vizita fali hodi fó resposta ba pergunta neʼe. Tratu sira-nia modelu foun ajuda ita atu halo tuir hakat sira-neʼe.
3. Oinsá mak ita bele fahe tratu sira-neʼe iha serbisu haklaken?
3 Oinsá atu uza: (1) Depois kumprimenta tiha uma-naʼin, hatudu ba nia pergunta iha oin no husu ninia hanoin. (2) Loke tratu no koʼalia kona-ba parte “Saida mak Bíblia hatete?” Se bele, eskritura neʼebé hakerek iha parte neʼe, lee kedas husi Bíblia. Se uma-naʼin iha tempu, koʼalia kona-ba “Ida-neʼe kona ita oinsá?” (3) Fó tratu ba nia no husu nia atu lee informasaun neʼe kuandu nia iha tempu. (4) Antes ita bá, hatudu ba nia pergunta iha kotuk iha liafuan “Hanoin toʼok” nia okos, no halo planu atu vizita fali hodi fó resposta husi Bíblia.
4. Oinsá mak ita bele uza tratu foun sira kuandu ita vizita fali?
4 Fasil mós atu halo vizita fali. Uza eskritura sira iha tratu nia kotuk atu hatán ba pergunta neʼebé ita husu ba uma-naʼin kuandu ita vizita nia ba dala primeiru. Antes ita bá, hatudu dezeñu kona-ba broxura Liafuan Diʼak. Hatudu broxura neʼe ba nia no mós lisaun neʼebé esplika liután kona-ba tópiku neʼebé ita foin koʼalia, depois fó broxura ba uma-naʼin. Se nia simu, halo planu atu koʼalia kona-ba broxura neʼe kuandu ita vizita fali. Hanesan neʼe, ita komesa ona estudu Bíblia! Ka, duké fó broxura, ita bele fó tratu seluk no halo planu atu koʼalia kona-ba informasaun neʼe ho uma-naʼin kuandu ita vizita fali.
5. Tanbasá mak ita-nia tratu sira folin-boot iha serbisu haklaken?
5 Ba tinan 130 ona, ita uza tratu sira kuandu ita haklaken. Maski sira-nia modelu oioin, maibé tratu sira ajuda ita hetan rezultadu diʼak iha serbisu haklaken. Mai ita uza didiʼak tratu foun sira-neʼe hodi kontinua habelar matenek kona-ba Bíblia ba mundu tomak.—Provérbios (Amsal) 15:7a.