Oinsá atu komesa koʼalia hodi uza panfletu

Husi Janeiru 2018, Moris Kristaun no Haklaken Programa no nota, iha pájina nia oin fó sai ezemplu kona-ba oinsá atu koʼalia ho ema. Ita simu ona laran-manas atu koko dada lia ho ema duké fó deʼit publikasaun ruma. Atu ajuda ita, iha mós vídeo kona-ba ezemplu atu haklaken neʼebé hatudu oinsá atu uza deʼit Bíblia hodi koʼalia ho ema. Neʼe katak ita labele uza publikasaun sira kuandu haklaken ka lae? Lae. Porezemplu, ita bele uza panfletu sira atu hahú koʼalia ho ema. Ita bele halo tuir ezemplu tuirmai bainhira uza panfletu sira:

1. Uza pergunta neʼebé hakerek iha oin.

2. Hatudu Bíblia nia resposta husi eskritura neʼebé iha pájina segundu nia leten. Se tempu sei iha, lee no koʼalia hamutuk informasaun balu husi panfletu neʼe.

3. Fó panfletu ba uma-naʼin, no fó laran-manas ba nia atu lee liután informasaun iha laran.

4. Antes fila, hatudu pergunta husi “Hanoin toʼok” iha kotuk, no halo arranju hodi bele koʼalia hamutuk Bíblia nia resposta.

Bainhira vizita fali, fó sai kona-ba resposta no husik hela pergunta ida tan atu bele koʼalia hamutuk iha tempu seluk. Ita bele hili pergunta ida husi ita-nia website ka husi ita-nia publikasaun neʼebé fó sai iha pájina kotuk. Iha tempu tuirmai, Ita bele hatudu broxura Liafuan Diʼak Husi Maromak ka publikasaun ruma husi ita-nia Ekipamentu Hanorin nian.