Maromak Jeová haree haʼu ema oinsá?
1. Oinsá mak Bíblia sai hanesan espellu?
1 Loroloron, Ita leno an iha espellu ka lae? Ita hotu sempre leno an tanba ida-neʼe ajuda ita atu hadiʼa ita-nia an. Bíblia mak hanesan espellu. Hodi lee Bíblia ajuda ita atu hatene didiʼak ita-nia an no Maromak Jeová haree ita ema oinsá. (1 Samuel 16:7; Tiago 1:22-24) Maromak nia Liafuan bele fó sai “ema nia hanoin no hakarak iha laran”. (Ebreu 4:12) Entaun, oinsá mak lee Bíblia loroloron no hanoin didiʼak bele ajuda ita atu hadiʼa an hodi bele sai haklaken-naʼin neʼebé diʼak liután?—Salmo (Mazmur) 1:1-3.
2. Oinsá mak Bíblia bele ajuda ita atu buka-hatene kona-ba ita-nia an rasik?
2 Uza Bíblia hanesan espellu: Liuhusi istória kona-ba Maromak Jeová nia atan, ita bele aprende hahalok sira neʼebé Jeová hafolin. Porezemplu, David hatudu laran-manas hodi defende Maromak nia naran. (1 Samuel 17:45, 46) Isaías hatudu aten-brani hodi haklaken ba ema neʼebé ulun-toos. (Isaías [Yesaya] 6:8, 9) Jesus hadomi tebes ninia Aman, tan neʼe nia la hanoin katak serbisu haklaken mak buat neʼebé hatodan nia, maibé nia sente kmaan no kontente hodi halaʼo ida-neʼe. (João 4:34) Ema kristaun sira iha apóstolu nia tempu mós haklaken ho laran-manas, sira tau fiar ba Jeová no nunka rende an. (Apóstolu 5:41, 42; 2 Korinto 4:1; 2 Timóteo 4:17) Hodi hanoin didiʼak ezemplu hirak-neʼe sei ajuda ita atu buka-hatene didiʼak kona-ba ita-nia an ita ema oinsá no hadiʼa ita-nia serbisu haklaken hodi laʼo tuir sira-nia ain-fatin.
3. Tanbasá mak ita labele demora atu troka ita-nia hahalok neʼebé ita presiza hadiʼa?
3 Hadiʼa ita-nia an: Maski ita hateke beibeik ba espellu hodi leno an, maibé se ita la hadiʼa buat neʼebé ladún diʼak, neʼe sei sai saugati deʼit. Nuneʼe mós, Ita tenke husu Jeová nia ajuda atubele hatene didiʼak ita-nia an no tuirmai hadiʼa ita-nia hahalok. (Salmo [Mazmur] 139:23, 24; Lucas 11:13) Tanba mundu nia rohan besik ona no ita-nia serbisu haklaken bele salva ita-nia an rasik no ema seluk nia moris, tan neʼe ita labele demora atu troka ita-nia hahalok neʼebé ita presiza hadiʼa.—1 Korinto 7:29; 1 Timóteo 4:16.
4. Se ema ida hateke didiʼak ba Maromak nia Liafuan no hadiʼa ninia an, neʼe sei lori rezultadu saida?
4 Jeová haree liuliu ba ita-nia laran. Tan neʼe, ita ema oinsá iha laran mak importante liu fali duké oinsá ema haree ita husi liʼur. (1 Pedro 3:3, 4) Se ema ida hateke didiʼak ba Maromak nia Liafuan no hadiʼa ninia an, neʼe sei lori rezultadu saida? Nia sei sai “ema neʼebé halo tuir liafuan, laʼós nuʼudar ema neʼebé haluhadór, no nia sei haksolok hodi halo ida-neʼe”. (Tiago 1:25) Mai ita “haleno Jeová nia glória hanesan espellu”, hodi nuneʼe ita bele sai haklaken-naʼin neʼebé diʼak no kontente tebes.—2 Korinto 3:18.