Ita haklaken Maromak nia Ukun ba tinan 100 ona!
1. Besik tinan 100 liubá, irmaun Rutherford anima Maromak nia povu atu halo saida?
1 Besik tinan 100 liubá, irmaun Rutherford fó laran-manas ba Maromak nia povu, hodi dehan: “Haree, Liurai neʼe ukun daudaun ona! Imi mak ninia atan sira. Tan neʼe, haklaken, haklaken, haklaken kona-ba Liurai no ninia ukun.” Husi tempu neʼebá, Jeová nia povu haklaken duni kona-ba Maromak nia Ukun iha mundu tomak! Hanesan ho ema kristaun sira iha apóstolu nia tempu, ita mós habelar ona liafuan diʼak “ba ema hotu iha lalehan okos”. (Koloso 1:23) Agora, mai ita hanoin fali kona-ba ita-nia serbisu haklaken durante tinan 100 hodi apoia Maromak nia Ukun. Tuirmai, buka-hatene oinsá mak ita bele kontinua haklaken iha tinan espesiál neʼe.
2. Tanbasá mak ita-nia livru sira ajuda ita atu haklaken Maromak nia Ukun?
2 Hanoin fali: Ba tinan barak ona, ita haklaken Maromak nia Ukun hodi fahe livru sira. Iha tinan 1939, revista ida neʼebé ita uza beibeik atu haklaken troka naran ba Livru Haklaken—Fó sai Maromak Jeová nia Ukun (iha lia-inglés). Revista neʼe esplika liuliu kona-ba saida mak Maromak sei halo liuhusi ninia Ukun. Revista Matan-moris bá! mós fó sai katak só Maromak nia Ukun deʼit mak bele rezolve problema oioin neʼebé ema hasoru ohin loron. Tuir loloos, revista rua neʼe mak print barak liu fali revista sira seluk iha mundu tomak!—Apokalipse 14:6.
3. Iha tempu uluk no ohin loron, Maromak nia povu uza ekipamentu saida deʼit atu haklaken?
3 Maromak Jeová nia povu mós uza ekipamentu oioin atu haklaken. Iha tempu uluk, Maromak nia povu uza rádiu, fonógrafu kiʼik, no karreta neʼebé tula koluna lian atu habelar liafuan diʼak ba ema barak, liuliu tanba iha tempu neʼebá, haklaken-naʼin sira seidauk barak. (Salmo [Mazmur] 19:4) Ohin loron, ita uza sítiu jw.org hodi fahe informasaun kona-ba Maromak nia Ukun ba ema barak, inklui mós ba sira neʼebé hela iha nasaun neʼebé ita la livre atu haklaken.
4. Ita halaʼo atividade espesiál saida deʼit?
4 Jeová nia povu mós halaʼo atividade espesiál oioin atu haklaken Maromak nia Ukun. Porezemplu, maizumenus iha tinan 1995, ita komesa haklaken iha fatin públiku hanesan jardín, fatin para karreta, no loja sira, atu fahe liafuan diʼak ba ema neʼebé ita la bele hasoru iha haklaken husi uma ba uma. Foin daudauk, ita mós komesa organiza haklaken espesiál iha sidade boot sira, no kongregasaun ida-idak mós haklaken iha fatin públiku hodi uza karrosa. Maibé labele haluha katak dalan neʼebé importante liu ba ita atu haklaken mak husi uma ba uma.—Apóstolu 20:20.
5. Iha tinan foun haklaken nian, haklaken-naʼin sira bele halo saida?
5 Hanoin ba futuru: Baibain, fulan-Setembru mak hahú tinan foun haklaken nian no irmaun-irmán barak komesa serbí nuʼudar pioneiru regulár. Oinsá ho Ita-Boot? Se la bele sai pioneiru regulár, dala ruma bele foti pioneiru estra ka lae? Maski bele ka la bele foti pioneiru, Maromak Jeová sei nafatin haraik bensaun ba Ita-Boot nia hakaʼas-an atu haklaken kona-ba Ninia Ukun.—Malaquias (Maleakhi) 3:10.
6. Tanbasá fulan-Outubru 2014 mak fulan espesiál?
6 Iha fulan-Outubru 2014 mak Maromak nia Ukun foin tama ba tinan 100. Tan neʼe, Livru Haklaken públiku nian ba fulan-Outubru sei fó sai tópiku espesiál kona-ba Maromak nia Ukun. Entaun, mai ita hakaʼas an atu fahe revista neʼe ba ema hotu. Hodi hein ba futuru neʼebé kapás, mai ita kontinua “haklaken liafuan diʼak kona-ba Maromak nia Ukun” ba ema hotu neʼebé prontu atu rona.—Apóstolu 8:12.