Uza sítiu jw.org bainhira haklaken ba ema

Ita-nia sítiu mak buat kapás ida neʼebé ajuda tebes ita atu habelar liafuan diʼak “toʼo rai nia rohan”. (Apóstolu 1:8) Maibé ema la bele hatene otomatis deʼit kona-ba sítiu jw.org. Sira presiza ita atu fó-hatene kona-ba sítiu neʼe.

Katuas área nian ida download tiha vídeo Tanbasá Estuda Bíblia? iha ninia telefone no sempre uza iha haklaken hodi loke ba ema barak atu nonton. Bainhira haklaken husi uma ba uma, nia dehan: “Ohin loron, haʼu vizita ema atu ajuda sira hatene kona-ba pergunta tolu: Tansá mak mundu nakonu ho problema? Oinsá mak Maromak sei hadiʼa mundu neʼe? No oinsá mak ita bele hasoru problema sira agora daudaun? Haʼu sei loke vídeo ida neʼebé fó resposta ba pergunta hirak-neʼe.” Nia loke kedas vídeo neʼe no hateke ba uma-naʼin nia oin. Ema barak gosta nonton vídeo neʼe toʼo hotu. Depois katuas área nian dehan: “Ohin iha vídeo neʼe dehan ita bele estuda Bíblia neʼebé la presiza selu. Agora, haʼu bele hatudu ba Ita-Boot oinsá halaʼo estudu neʼe.” Se uma-naʼin hakarak, nia uza parágrafu balu husi broxura Liafuan Diʼak. Se uma-naʼin tempu la iha, irmaun hameno tempu ida atubele vizita fali nia. Bainhira nia bá deskansa iha fatin ruma hanesan fatin hemu kafé, nia sempre koʼalia ho ema neʼebé tuur besik hodi uza dalan hanesan ohin temi. Oinsá ho Ita-Boot sira? Imi uza sítiu jw.org bainhira haklaken ba ema ka lae?