Knananuk foun ba adorasaun!
1 Iha reuniaun boot tinan nian husi Watch Tower Bible and Tract Society of Pennsylvania neʼebé halaʼo iha 4 Outubru 2014, irmaun sira fó-hanoin ema hotu neʼebé tuir katak kanta knananuk sira mak parte importante iha ita-nia adorasaun ba Jeová. Depois, sira fó sai planu atu hadiʼa fali ita-nia livru kanta. Liafuan neʼe halo ema hotu kontente tebes!—Salmo (Mazmur) 96:2.
2 Maibé tanbasá mak presiza hadiʼa ita-nia livru kanta? Primeiru, ita-nia komprensaun kona-ba eskritura sira laʼo ba oin beibeik, no ida-neʼe bele kona mós ita-nia knananuk sira. (Provérbios [Amsal] 4:18) No mós, iha língua barak, liafuan sira iha ita-nia livru kanta foti husi Bíblia Tradusaun Mundu Foun edisaun uluk nian. Maibé agora, liafuan sira-neʼe presiza troka hodi tuir Bíblia nia edisaun foun. Tanba presiza serbisu barak hodi hadiʼa ita-nia livru kanta, irmaun sira deside mós atu aumenta knananuk foun balu.
3 Ami mós kontente hodi fó sai katak durante fulan balu tuirmai, ita bele download knananuk balu iha ita-nia sítiu jw.org. Bainhira knananuk foun ida sai iha jw.org, ami sei fó-hatene knananuk neʼe liuhusi oráriu iha Ita-nia Serbisu Kristaun hodi ita bele kanta knananuk neʼe iha Reuniaun Serbisu nian. Nuneʼe, ita la presiza hein toʼo ita hetan livru foun mak ita foin bele kanta knananuk foun sira.
4 Oinsá atu aprende knananuk foun sira: Dala ruma susar uitoan atu aprende knananuk foun. Maibé, ita hakarak banati-tuir ema neʼebé hakerek Salmo hodi kanta ba Jeová iha reuniaun sira no la bele sai nonook deʼit. (Salmo [Mazmur] 30:12) Sujestaun sira tuirmai bele ajuda ita aprende kanta knananuk foun sira.
• Rona beibeik ba múzika neʼebé ita bele hetan husi ita-nia sítiu halo fasil liu ba ita atu hanoin-hetan melodia sira.
• Lee didiʼak liafuan sira no koko atu dekór didiʼak.
• Kanta beibeik knananuk neʼe hamutuk ho nia múzika toʼo ita domina didiʼak knananuk neʼe.
• Treinu knananuk sira-neʼe iha Adorasaun Família nian toʼo ema hotu bele kanta didiʼak.
5 Bainhira atu kanta knananuk foun ida hodi remata Reuniaun Serbisu nian, ita sei rona uluk lai ba knananuk nia múzika tomak. Depois mak kongregasaun sei kanta akompaña ho múzika hamutuk.
6 Hodi kanta hamutuk iha kongregasaun, neʼe mak oportunidade furak atu hahiʼi Jeová ho lian ida deʼit. Nuneʼe, keta sai toman atu sai ba liʼur bainhira tempu atu kanta knananuk sira.
7 Iha mós dalan seluk ita bele hatudu agradese ba ita-nia múzika neʼebé santu. Baibain, programa ba reuniaun boot sira mós inklui rona múzika antes diskursu sira hahú. Tinan ida dala rua, irmaun no irmán sira husi rai oioin, gasta sira-nia tempu no ho sira-nia osan rasik bá iha Patterson, Novaiorke hodi toka no grava múzika furak hodi ita bele uza iha ita-nia adorasaun. Tan neʼe, bainhira aprezentadór husu ita atu tuur, diʼak atu halo tuir hodi rona didiʼak ba múzika sira. Hodi halo nuneʼe ita mós bele prepara ita-nia laran atu simu informasaun husi reuniaun boot neʼe.—Esdras (Ezra) 7:10.
8 Reuniaun neʼe remata tiha, ita sei kanta ita-nia knananuk foun ida kona-ba Maromak nia Ukun. Knananuk neʼe, sira uza mós iha reuniaun boot tinan nian, no irmaun sira hakerek knananuk neʼe liuliu atu halo aniversáriu tinan 100 ba Maromak nia Ukun neʼebé harii ona iha lalehan.
9 Knananuk foun sira mak “buat diʼak” duni husi Jeová. (Mateus 12:35a) Mai ita hotu hakaʼas an aprende no kanta husi laran knananuk foun sira-neʼe, hodi fó glória, hahiʼi no respeitu ba ita-nia Maromak!—Salmo (Mazmur) 147:1.