Ajuda ema matan-delek sira aprende kona-ba Jeová

1. Oinsá mak Jesus hatudu laran-sadiʼa ba ema matan-delek sira?

¹ Bainhira Jesus laʼo sai husi sidade Jerikó, mane naʼin-rua neʼebé matan-delek husu favór ba Jesus dehan: “Naʼi, . . . hatudu laran-sadiʼa mai ami!” Maski Jesus hanoin barak kona-ba susar neʼebé nia atu hasoru antes nia mate, maibé nia para, bolu mane sira-neʼe, no kura sira. (Mateus 20:29-34) Oinsá mak ita bele halo tuir Jesus atu hatudu laran-sadiʼa ba ema matan-delek sira?

2. Oinsá mak ita bele fó sasin ba ema matan-delek neʼebé ita hasoru iha dalan?

² Ajuda sira: Se ita hasoru ema matan-delek ida iha dalan, husu se iha buat ruma ita bele halo atu ajuda nia. Karik foufoun ema neʼe sei deskonfia uitoan tanba baibain ema bele bosok sira. Maibé se ita hatudu laran-diʼak husi laran, ema neʼe sei la sente taʼuk ho ita. Atu bele fó ajuda, ita presiza haree didiʼak ema ida-idak nia situasaun, tanba ema balu matan sei bele haree uitoan, balu delek loos ona. Ajuda tiha ema neʼe, ita bele dehan ba nia katak ita hola parte iha serbisu edukasaun nian kona-ba Bíblia. Husu atu lee eskritura ida hanesan Salmo (Mazmur) 146:8 ka Isaías (Yesaya) 35:5, 6. Ita mós bele buka informasaun balu husi jw.org hodi nia bele rona ba ita-nia livru ka tratu sira neʼebé grava tiha ona.—Haree kaixa “Fó ajuda ba ema matan-delek”.

3. Saida mak ita bele halo atu buka ema matan-delek iha ita-nia área haklaken?

³ Buka ema matan-delek sira: Bainhira ita bá haklaken husi uma ba uma, baibain ita ladún hasoru ho ema matan-delek sira tanba sira moe ka taʼuk atu koʼalia ho ema neʼebé sira la koñese. Nuneʼe ita presiza hakaʼas an atu buka sira hodi haklaken ba ema sira-neʼe. (Mateus 10:11) Se ita koñese ema matan-delek ruma, koko atu bá buka koʼalia ho nia. Iha ita-nia área, iha ka lae, eskola ida ba matan-delek sira? Se iha, bele lori ita-nia gravasaun ruma atu fó ba sira. Ita koñese ema ruma neʼebé nia família ida mak matan-delek ka lae? Ka iha organizasaun ruma iha ita-nia área neʼebé fó ajuda ba matan-delek sira ka lae? Ita bele esplika ba sira katak Testemuña ba Jeová hakarak tebes ajuda ema matan-delek, no husu atu vizita fali hodi lori ita-nia gravasaun ruma. Esplika kona-ba Bíblia nia promete katak lakleur tan, ema matan-delek sira-nia matan sei loke. Se ita esplika tanbasá ita vizita sira, neʼe bele loke dalan ba ita atu hasoru ho ema neʼebé matan-delek.“Without It, I Would Feel Lost,”.

4. Ita aprende saida husi Janet nia esperiénsia?

⁴ Irmán matan-delek ida naran Janet, bá vizita fatin ida neʼebé matan-delek sira hela. Nia koʼalia ho feto-joven idaneʼebé laʼós matan-delek no dehan: “Jesus uluk kura ema matan-delek sira atu hatudu buat neʼebé nia sei halo ba ema matan-delek sira hotu iha futuru.” Sira lee hamutuk Apokalipse 21:3, 4 no Janet esplika oinsá Maromak sei kumpre promesa sira-neʼe liuhusi ninia Ukun. Feto neʼe sai nonook tiha, tuirmai nia dehan: “Haʼu seidauk rona ida-neʼe husi ema matan-delek ida. Baibain ema hanoin katak ema sai matan-delek tanba sira ka sira-nia beiʼala halo sala.” Janet haruka email ba feto neʼe oinsá mak nia bele hetan livru Bíblia Hanorin, no agora sira estuda Bíblia semana ida dala rua.

5. Maski ita la bele kura ema matan-delek, ita bele hetan bensaun saida se ita hatudu interese ba sira?

⁵ Ita la bele kura ema matan-delek hanesan Jesus halo, maibé ita bele ajuda ema neʼebé delek iha dalan espirituál tanba “maromak mundu neʼe nian taka netik sira-nia neon” atu la bele komprende kona-ba Maromak nia Liafuan. (2 Korinto 4:4) Jesus kura mane naʼin-rua neʼebé matan-delek besik Jerikó tanba nia “hanoin tebetebes sira”. (Mateus 20:34) Se ita mós hatudu interese no hanoin ema matan-delek, ita bele sente kontente hodi ajuda sira hakbesik ba Jeová, ida neʼebé sei kura ema matan-delek sira hotu.