Tau fokus nafatin atu hanorin ema sai dixípulu

1. Saida mak ita presiza halo atu ema hetan salvasaun?

¹ Relatóriu haklaken nian ba tinan 2014 hatudu katak irmaun-irmán sira badinas no laran-manas atu haklaken Maromak nia Ukun. (Mateus 24:14) Liuhusi haklaken uma ba uma, kampaña espesiál sira atu fahe tratu no konvite, no mós liuhusi haklaken públiku, ita bele fahe Bíblia nia mensajen ba ema barak liu. Maibé atu ema bele hetan salvasaun, ita mós presiza ajuda sira sai Jesus nia dixípulu. Ita halo nuneʼe hodi estuda Bíblia ho sira.—1 Timóteo 2:4.

2. Pergunta saida mak ita bele husu ba ita-nia an atu ajuda ita sai prontu atu komesa estuda Bíblia ho ema?

² Sempre prontu atu komesa estudu Bíblia: Bainhira ita hasoru ema ida neʼebé hatudu interese, ita badinas ka lae atu hakerek ninia informasaun no lalais atu vizita fali nia hodi koko estuda ho nia? Bainhira ita foin vizita ema, ita koko atu hatudu oinsá ita estuda Bíblia ka lae? Ba ema neʼebé ita sempre fó revista foun, ita husu sira atu estuda Bíblia ka lae? Ita hatudu ona vídeo sira ba ita-nia kolega serbisu, kolega eskola, viziñu sira, família no ema seluk tan kona-ba Tanbasá Estuda Bíblia? no Oinsá mak ami halaʼo estuda Bíblia ho ema? Bainhira ema foti ita-nia livru ruma husi karrosa, ita dehan ba sira katak sira mós bele estuda Bíblia gratis ka lae?

3. Atu hanorin lia-loos ho diʼak, saida mak ita presiza?

³ Ajuda husi Jeová no Jesus: Bainhira Jesus haruka atu hanorin ema sai ninia dixípulu, nia uza liafuan “laʼo bá”. Neʼe hatudu ita presiza duni hakaʼas an. Maibé Jesus la husik ita mesak deʼit mak halo serbisu neʼe. Nia promete katak nia sei hamutuk ho ita. (Mateus 28:19, 20) Liután neʼe, Jeová fó ninia espíritu santu no mós treinu neʼebé ita presiza atu hanorin lia-loos. (Zacarias [Zakharia] 4:6; 2 Korinto 4:7) Ita bele halo orasaun atu haburas “hakarak” no hetan “kbiit” atu hola parte iha serbisu importante neʼe.—Filipe 2:13.

4. Tanbasá mak ita presiza tau fokus nafatin atu hanorin ema sai Jesus nia dixípulu?

⁴ Haklaken liafuan diʼak lori ita solok no kontente. Maibé ita sai kontente liután se ita bele hanorin lia-loos ba ema no ajuda sira laʼo iha dalan neʼebé “lori ema ba moris”. (Mateus 7:14; 1 Tesalónika 2:19, 20) Hodi tau fokus nafatin atu hanorin ema sai Jesus nia dixípulu sira, ita halo kontente Jeová tanba nia “lakohi ema ida lakon maibé nia hakarak ema hotu atu hakribi sala”.—2 Pedro 3:9.