Sempre prontu konvida ema atu estuda Bíblia
1. Atu halaʼo knaar neʼebé Jesus haruka iha Mateus 28:19, 20, ita presiza halo saida?
1 Jesus fó knaar mai ita atu “hanorin” ema. (Mt 28:19, 20) Tan neʼe, ita hakarak prontu nafatin konvida ema atu estuda Bíblia, laʼós deʼit iha loron haklaken espesiál atu konvida ema atu estuda Bíblia. Matadalan tuirmai neʼe sei ajuda ita atu halo nuneʼe.
2. Ba sé deʼit mak ita bele konvida atu estuda Bíblia?
2 Konvida: Kuandu ita konvida ema barak liután atu estuda Bíblia, oportunidade atu hetan estudu Bíblia mós sei aumenta liután. (Ecle 11:6) Ita koko ona atu koʼalia kedas kona-ba estudu Bíblia ka lae? Iha kongregasaun ida iha rai-Estadus Unidus, irmaun-irmán sira hakaʼas an hamutuk hodi konvida kedas ema atu estuda Bíblia durante fulan ida tomak nia laran. Rezultadu mak sira hetan estudu Bíblia foun hamutuk 42! Keta hanoin deʼit katak sira neʼebé ita vizita fali beibeik hatene ona katak Ita prontu atu estuda Bíblia ho sira. Kuandu Ita sei vizita fali sira, koko toʼok konvida sira atu estuda ho Ita! Se sira la simu, neʼe la buat ida. Ita bele kontinua halo vizita fali hodi book sira atu hakarak aprende lia-loos. Ita mós konvida ona Ita-nia viziñu, família, kolega serbisu, no kolega eskola atu estuda Bíblia ho Ita ka lae? Liután neʼe, Ita mós bele husu Ita-nia estudante Bíblia se sira koñese kolega ka família ruma neʼebé karik gosta estuda Bíblia.
3. Tratu saida mak ajuda ita atu komesa estudu? No oportunidade saida deʼit mak ita iha atu uza tratu neʼe?
3 Uza tratu: Ita iha tratu kapás neʼebé ajuda ita atu komesa estuda Bíblia. Neʼe mak Ita Hakarak Hatene Lia-Loos ka lae? Ita bele fó tratu neʼe ba ema hotu neʼebé ita hasoru iha serbisu haklaken, maski sira simu ka la simu ita-nia livru sira. Ita mós bele fahe tratu neʼe iha loja, iha dalan, kuandu haruka surat, no mós kuandu ita halo vizita fali. Ita mós bele tau tratu ida iha uma neʼebé ema la iha. Diʼak mós sempre lori tratu neʼe kuandu ita saʼe bís, kuandu bá hola sasán, ka kuandu bá serbisu. Pájina ikus iha tratu neʼe esplika kona-ba programa estudu Bíblia no kona-ba livru Bíblia Hanorin.
4. Oinsá mak ita bele uza tratu Hatene Lia-Loos hodi komesa estudu?
4 Kuandu fó tratu neʼe ba ema, ita bele hatudu pergunta sira iha pájina primeiru, no husu: “Husi pergunta sira-neʼe, ida-neʼebé mak ita hakarak atu hatene liután?” Tuirmai, koʼalia hamutuk kona-ba resposta husi tratu neʼe, no depois lee ka esplika pájina ikus kona-ba arranju estudu Bíblia. Tuirfalimai, loke livru Bíblia Hanorin hodi hatudu pájina neʼebé esplika liután informasaun neʼebé foin koʼalia, fó livru neʼe, no halo arranju hamutuk atu vizita fali hodi kontinua koʼalia liután kona-ba neʼe.
5. Tansá mak ita sempre presiza sai prontu konvida ema atu estuda Bíblia?
5 Iha ita-nia haklaken-fatin, sei iha ema neʼebé hakarak hatene tuir loloos saida mak Bíblia hanorin. Kuandu ita sempre prontu konvida ema atu estuda Bíblia, ita sei hetan oportunidade barak liután atu haksolok hodi ajuda ema atu laʼo iha dalan neʼebé lori ba moris.—Mt 7:13, 14.