Loron haklaken espesiál atu konvida ema atu estuda Bíblia
1 Komesa husi fulan-Janeiru, kongregasaun ida-idak sei hili loron-sábadu ka domingu ida iha fulan ida nia laran, karik iha semana primeiru, atu konvida ema atu estuda Bíblia. Loron espesiál neʼe halaʼo iha loron-sábadu ka domingu, loron neʼebé diʼak liu ba haklaken-naʼin no mós ba haklaken-fatin. Se uma-naʼin la simu atu estuda Bíblia iha loron neʼe, haklaken-naʼin bele fahe livru Bíblia Hanorin ka livru fulan-fulan nian. Katuas no atan ministeriál hotu presiza halo planu diʼak atu hola parte iha atividade espesiál neʼe no ajuda haklaken-naʼin sira atu komesa estudu Bíblia.
2 Kongregasaun nia Grupu Serbisu mak sei hili loron haklaken espesiál neʼe atu konvida ema atu estuda Bíblia. Karik fulan-fulan haklaken-naʼin sira presiza atu hetan avizu kona-ba loron neʼe iha reuniaun. Hodi nuneʼe, sira bele prepara didiʼak no hakaʼas an atu konvida ema atu estuda Bíblia kuandu haklaken husi uma ba uma, no mós kuandu vizita ema neʼebé uluk hatudu interese.
3 Oinsá atu prepara: Ita bele hetan ezemplu balu husi surat neʼebé tradús ba lia-tetun ho títulu “Oinsá mak atu komesa estudu hodi uza livru Bíblia Hanorin” (ka Pelayanan Kerajaan Kita Januari 2006 iha pájina 3), no mós husi livru Bertukar Pikiran iha pájina 12. Balu karik hakarak uza tratu hanesan Ita Hakarak Hatene Lia-Loos ka lae? No mós Pelayanan Kerajaan Kita Agustus 2007 iha pájina 3 fó ezemplu kona-ba komesa estudu Bíblia ho ema neʼebé simu ona livru fulan-fulan nian. Katuas no atan ministeriál sira sei simu knaar atu halaʼo reuniaun serbisu haklaken nian, neʼebé halaʼo iha minutu 10 toʼo 15, atu fó sai ezemplu ida ka rua ka halo drama kiʼik kona-ba oinsá konvida ema atu estuda Bíblia.
4 Klaru katak laʼós ema hotu sei hakarak estuda Bíblia no kontinua estudu ba tempu kleur. Maibé labele husik ida-neʼe atu hapara ita, tanba Maromak Jeová mak dada ema neʼebé hatudu hahalok hanesan bibi atu tama ba ninia organizasaun. (Joao 6:44) Ita-nia responsabilidade laʼós deʼit atu kari fini lia-loos nian, maibé mós atu rega fini neʼebé komesa abut. Ida-neʼe inklui atu halaʼo estudu Bíblia ho sira neʼebé gosta atu aprende kona-ba Maromak Jeová. Hodi halo nuneʼe, ita halaʼo ita-nia knaar espesiál nuʼudar Maromak nia serbisu-naʼin.—1 Kor 3:9.