Uza iha situasaun hotu
1. Ita bele uza tratu Hatene Lia-Loos atu halo saida?
1 Ita bele uza tratu Ita Hakarak Hatene Lia-Loos ka lae? atu komesa estuda Bíblia ho ema. Liután neʼe, ita mós bele uza tratu ida-neʼe atu kari fini lia-loos nian iha situasaun oioin. (Ecle 11:6) Iha kraik ita bele hetan ezemplu balu neʼebé ajuda ita atu uza tratu neʼe ho didiʼak.
2. Oinsá mak ita bele uza tratu atu komesa koʼalia ho ema?
2 Atu komesa koʼalia ho ema: Karik ita bele hatudu ba uma-naʼin pergunta neen iha tratu neʼe nia oin, depois ita bele husu: “Husi pergunta sira-neʼe, ida-neʼebé mak kona Ita-nia laran?” Kuandu nia hili tiha pergunta ida, hatudu Bíblia nia resposta hodi loke no lee hamutuk informasaun iha tratu neʼe, no lee mós eskritura ida. Tuirmai, koʼalia kona-ba informasaun iha tratu neʼe nia kotuk, no fó ba uma-naʼin livru Bíblia Hanorin. Maski karik nia la simu livru neʼe, maibé nia simu ona tratu neʼe, no ida-neʼe mós bele halo lia-loos buras iha nia laran.—Mt 13:23.
3. Se uma-naʼin la iha tempu, ita bele halo saida?
3 Se uma-naʼin la iha tempu: Karik ita bele dehan: “Tanba agora Ita halo hela buat ruma, haʼu hakarak fó hela deʼit tratu neʼe. Tratu neʼe iha pergunta neen neʼebé ema barak husu, no fó resposta neʼebé klaru husi Bíblia. Kuandu haʼu mai fali iha tempu seluk, karik Ita bele koʼalia hamutuk kona-ba informasaun neʼe.”
4. Kuandu haklaken iha dalan, ita bele hatete saida?
4 Kuandu haklaken iha dalan: Karik ita bele hatete: “Bondia. Dala ruma ita husu ona pergunta hanesan sira-neʼe ka lae? [Hein ba resposta.] Tratu neʼe fó sai resposta neʼebé klaru husi Bíblia.” Se ema neʼe la ansi, karik ita bele koʼalia hamutuk kona-ba resposta ida husi tratu neʼe no mós fó livru Bíblia Hanorin.
5. Kuandu ema la iha, ita bele halo saida?
5 Kuandu ema la iha: Iha kongregasaun balu, kuandu haklaken-naʼin sira la hasoru ema iha uma ida, baibain sira rai hela tratu iha uma neʼe. Se ita-nia kongregasaun mós halo nuneʼe, dala ruma ita bele rai hela tratu Hatene Lia-Loos. Bainhira ita vizita fali, ita bele hatete: “Kuandu ami haklaken iha fatin neʼe Ita-nia odamatan taka hela, nuneʼe ami husik tratu neʼe iha Ita-nia uma. Husi pergunta sira-neʼe, ida-neʼebé mak Ita hakarak hetan resposta?”
6. Tanbasá mak diʼak atu uza tratu Hatene Lia-Loos kuandu haklaken?
6 Tratu Hatene Lia-Loos esplika lia-loos iha dalan neʼebé simples no klaru. Informasaun iha tratu neʼe diʼak ba ema husi relijiaun no kultura hotu. Tratu neʼe fasil atu uza kuandu haklaken, no tan neʼe labarik no haklaken-naʼin foun mós bele fahe tratu neʼe. Ita mós uza didiʼak tratu neʼe ka lae?