Kampaña espesiál atu fahe tratu durante 20 Outubru–16 Novembru!
1 Ba semana haat neʼebé komesa iha loron-segunda, 20 Outubru, ita sei halaʼo kampaña espesiál atu fahe tratu foun ida ho títulu Ita Hakarak Hatene Lia-Loos ka lae? Ita hein katak kampaña espesiál ida-neʼe neʼebé sei halaʼo iha mundu tomak bele ajuda ema barak liután atu hatene katak Maromak nia Liafuan deʼit mak hun ba lia-loos.—Joao 17:17.
2 Tratu ida-neʼe fó resposta badak husi Bíblia ba pergunta neen neʼebé importante tuirmai neʼe: “Tuir loloos, Maromak hanoin ita ka lae?” “Loron ida ema bele moris iha mundu neʼebé la iha tan funu no terus ka lae?” “Saida mak akontese ba ita kuandu ita mate?” “Iha ka lae esperansa ba ema neʼebé mate ona?” “Orasaun hanesan saida mak Maromak simu?” no “Oinsá mak haʼu bele sai kontente?” Relijiaun kristaun barak la bele fó resposta neʼebé loos ba pergunta hirak-neʼe. Ema barak neʼebé laʼós husi relijiaun kristaun mós hanoin kona-ba pergunta hirak-neʼe, maibé sira la hatene katak sira bele hetan resposta neʼebé loos husi Bíblia. Nuneʼe, ita hein katak informasaun iha tratu ida-neʼe sei book ema barak nia laran.
3 Haklaken ba uma hotu: Hakaʼas an atu haklaken ba uma hotu-hotu iha Ita-nia haklaken-fatin. Se Ita-nia haklaken-fatin iha uma barak liu, karik katuas sira sei fó-hatene ita atu husik tratu tahan ida iha uma neʼebé uma-naʼin la iha. La haluha atu fahe tratu foun ida-neʼe ba Ita-nia viziñu, família, no kolega sira iha serbisu-fatin ka eskola, no ema seluk neʼebé baibain Ita koʼalia. Karik Ita bele halo planu atu sai pioneiru ausiliár iha fulan-Outubru ka fulan-Novembru. Ita iha oan ka estudante Bíblia neʼebé laʼo ba oin iha lia-loos ka lae? Karik sira bele sai haklaken-naʼin no bele hamutuk ho Ita iha kampaña ida-neʼe. Se nuneʼe, fó-hatene ba katuas sira.
4 Oinsá atu fahe: Hodi bele fahe mensajen neʼe ba ema barak, diʼak atu Ita koʼalia badak deʼit. Ita bele husu ba uma-naʼin pergunta ida husi pergunta neen iha pájina primeiru husi tratu neʼe. Depois neʼe, ita bele hatudu resposta iha tratu laran. Ida-neʼe bele ajuda haklaken-naʼin ida atu koʼalia tuir buat neʼebé uma-naʼin nia presiza. Se ema ida hatudu interese, bele hakerek buat neʼebé Ita koʼalia ho nia no vizita fali nia. Iha loron-sábadu no loron-domingu, ita bele fahe tratu neʼe hamutuk ho livru fulan-fulan nian. Depois kampaña neʼe ramata iha loron 16 Novembru, ita sei fahe livru Bíblia Hanorin iha serbisu haklaken. Restu husi tratu ida-neʼe sei uza hanesan tratu sira seluk neʼebé ita iha.
5 Komesa estudu Bíblia: Ita uza tratu ida-neʼe liuliu atu komesa estuda Bíblia ho ema seluk. Kuandu Ita halo vizita fali ba ema neʼebé hatudu ona interese, Ita bele husu nia saida mak lia-loos husi Bíblia neʼebé hakerek iha tratu neʼe neʼebé halo nia sente kmaan. Ita bele hatudu ba nia tratu neʼe nia kotuk neʼebé hatudu kona-ba oinsá nia bele estuda Bíblia no fó ba nia livru Bíblia Hanorin. Se bele, uza minutu balun atu koʼalia ho nia parágrafu ida ka rua husi kapítulu ida-neʼebé esplika liután informasaun neʼebé nia hili.
6 Maromak Jeová buka ema neʼebé sei adora nia “tuir espíritu no lia-loos”. (Joao 4:23) Mai ita hotu halo parte iha kampaña espesiál ida-neʼe atu ajuda ema seluk hatene lia-loos!