Aumenta ita-nia matenek iha serbisu haklaken—Fó treinu ba ema foun

Tanbasá importante: Ita nuʼudar Jesus nia dixípulu sira, presiza halo tuir “buat hotu” neʼebé nia haruka, neʼe mós inklui hanorin lia-loos ba ema seluk. (Mateus 28:19, 20) Ema barak tama ona Eskola Serbisu Kristaun no karik sira mós haklaken kona-ba Maromak ba sira-nia família ka kolega sira. Maibé tanba sira hafolin buat neʼebé sira aprende no hatene katak Jeová hakarak ema hotu rona ninia mensajen, karik sira hakarak sai haklaken-naʼin ida. (Roma 10:13, 14) Sai ona haklaken-naʼin, ita bele fó treinu ba sira atu sira bele kaer didiʼak sira-nia responsabilidade foun neʼe no laʼo ba oin iha lia-loos.—Lucas 6:40.

Oinsá atu halo ida-neʼe:

Ajuda haklaken-naʼin foun atu foti livru sira neʼebé presiza atu bá haklaken no hanorin ema. Hatudu ba nia oinsá mak ita haloot livru sira iha ita-nia pasta haklaken nian no esplika tanbasá ita lori livru ida-idak.
Hili hamutuk husi Ita-nia Serbisu Kristaun ezemplu ida oinsá atu haklaken ba ema. Fó laran-manas ba nia atu koʼalia uza ninia liafuan rasik. Husi livru Eskola Kristaun, iha pájina 82, treinu hamutuk situasaun balu neʼebé diʼak ba ita-nia área. Diʼak mós atu koʼalia ho haklaken-naʼin foun neʼe tanbasá mak importante atu hatais no hadiʼa an ho respeitu.—2 Korinto 6:3, 4.
Treinu haklaken-naʼin foun neʼe tuir hakat ida-idak. Esplika oinsá mak kongregasaun nia haklaken fatin fahe tiha ona no hatudu oinsá atu hakerek informasaun kona-ba ema neʼebé hatudu interese. Hanorin nia atu uza sítiu jw.org no livru Kabar Baik bagi Orang-Orang dari Segala Bangsa bainhira nia haklaken. Ajuda nia bainhira nia halo vizita fali ba ema neʼebé hatudu interese.—1 Korinto 3:6.
Hatudu pasiénsia no gaba nia husi laran. (Provérbios [Amsal] 25:11) Hatudu ezemplu diʼak. Haklaken-naʼin foun neʼe sei nunka haluha laran-manas no interese neʼebé ita hatudu ba nia.

Koko ida-neʼe durante fulan neʼe:

Bá haklaken hamutuk ho ita-nia estudante ka lori nia ba estudu Bíblia ka vizita fali. Se ita la iha estudante neʼebé sai ona haklaken-naʼin, konvida haklaken-naʼin ida neʼebé seidauk iha esperiénsia barak atu bá hamutuk ho ita.