Ema neʼebé haklaken liafuan diʼak

JEOVÁ fó ninia Oan-Mane Jesus Kristu nuʼudar ezemplu neʼebé perfeitu atu ita banati-tuir. (1 Ped 2:21) Kuandu ema ida sai Jesus nia dixípulu, nia sai Maromak nia serbisu-naʼin neʼebé haklaken liafuan diʼak. Jesus hatudu katak serbisu neʼe sei lori kmaan, tanba nia hatete: “Mai besik haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi. Lori haʼu-nia ai-leba no aprende husi haʼu, tanba haʼu laran-maus no haraik an, no imi sei sente kmaan.” (Mt 11:28, 29) Ema neʼebé simu Jesus nia konvite sente duni katak Jesus nia liafuan neʼe mak loos.

² Maromak nia serbisu-naʼin neʼebé importante liu mak Jesus. No Jesus bolu ema oioin atu sai ninia dixípulu. (Mt 9:9; João 1:43) Nia treinu sira atu haklaken no haruka sira atu halo serbisu neʼebé nia mós halo. (Mt 10:1–11:1; 20:28; Lc 4:43) Liutiha tempu balu, nia mós haruka dixípulu naʼin-70 atu haklaken liafuan diʼak kona-ba Maromak nia Ukun. (Lc 10:1, 8-11) Kuandu Jesus haruka dixípulu sira-neʼe, nia hatete: “Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” (Lc 10:16) Jesus nia liafuan sira-neʼe hatudu katak dixípulu sira-nia knaar atu haklaken mak importante tanba sira reprezenta Jesus no Maromak neʼebé Aas Liu Hotu. Nuneʼe mós ho ema hotu neʼebé ohin loron simu Jesus nia konvite: “Mai tuir haʼu.” (Lc 18:22; 2 Kor 2:17) Sira hotu presiza halo tuir mandamentu atu haklaken liafuan diʼak no hanorin ema sai dixípulu.​—Mt 24:14; 28:19, 20.

³ Tanba ita simu ona Jesus nia konvite atu sai ninia dixípulu, ita “hatene didiʼak” Maromak Jeová no Jesus Kristu. (João 17:3) Jeová hanorin ona ita kona-ba ninia dalan sira. Jeová ajuda ita atu bele hafoun ita-nia hanoin, tau fali hahalok foun, no troka ita-nia hahalok hodi tuir Jeová nia matadalan neʼebé loos. (Rom 12:1, 2; Éf 4:22-24; Kol 3:9, 10) Tanba ita hafolin tebes buat hotu neʼebé Jeová halo ona mai ita, neʼe book ita atu dedika ita-nia moris ba Jeová no hatudu sai ita-nia dedikasaun hodi hetan batizmu. Bainhira ita hetan batizmu, ita kumpre kritéria atu sai Maromak Jeová nia atan.

⁴ Hanoin-hetan katak ita tenke serbí Maromak ho laran-moos no hahalok loos. (Sal 24:3, 4; Isa 52:11; 2 Kor 6:14–7:1) Ita hetan konxiénsia moos tanba tau fiar ba Jesus Kristu. (Ebr 10:19-23, 35, 36; Apok 7:9, 10, 14) Apóstolu Paulo anima ema Kristaun atu halo buat hotu ba Maromak nia glória atu nuneʼe sira la halo ema seluk sidi. Apóstolu Pedro fó sai katak importante atu hatudu ezemplu diʼak liuhusi ita-nia hahalok hodi bele book ema seluk atu simu lia-loos. (1 Kor 10:31, 33; 1 Ped 3:1) Oinsá Ita bele ajuda ema atu kumpre kritéria hodi sai haklaken-naʼin?

HAKLAKEN-NAʼIN FOUN

⁵ Bainhira Ita komesa estuda Bíblia ho ema, anima nia atu fó-hatene ba ema seluk buat neʼebé nia aprende. Nia bele halo nuneʼe iha dalan la formál hodi koʼalia ba ninia família, kolega, maluk serbisu ka ema seluk. Neʼe mak hakat importante atu hanorin ema foun sai Jesus Kristu nia dixípulu neʼebé haklaken lia-loos. (Mt 9:9; Lc 6:40) Bainhira ninia relasaun ho Maromak sai metin liután no sai toman atu haklaken iha dalan la formál, karik nia sei fó sai ninia hakarak atu haklaken hamutuk ho kongregasaun.

KRITÉRIA ATU SAI HAKLAKEN-NAʼIN

⁶ Antes konvida estudante Bíblia ida atu haklaken husi uma ba uma ba dala primeiru, Ita presiza buka-hatene se nia kumpre ona kritéria. Bainhira Ita-nia estudante ida akompaña Ita bá haklaken, ema sei haree nia nuʼudar Testemuña ba Jeová. Tan neʼe, nia tenke moris tuir ona Jeová nia matadalan neʼebé loos no bele sai haklaken-naʼin neʼebé seidauk hetan batizmu.

⁷ Bainhira Ita estuda ho ema ida no koʼalia hamutuk kona-ba Bíblia nia prinsípiu sira, ikusmai Ita sei hatene oinsá nia halaʼo ninia moris. Karik Ita haree katak agora nia moris tuir buat neʼebé nia aprende. Maibé katuas sira mós hakarak atu koʼalia hamutuk ho Ita no Ita-nia estudante, atu nuneʼe sira bele hatene buat balu kona-ba estudante nia moris.

⁸ Koordenadór ba grupu katuas sei arranja katuas naʼin-rua atu koʼalia kona-ba kritéria sira ho Ita no Ita-nia estudante Bíblia. Katuas ida tenkesér membru husi Komisaun Administrasaun ba Kongregasaun. Kuandu iha katuas uitoan deʼit iha kongregasaun, katuas ida ho atan ba kongregasaun ida neʼebé iha abilidade bele halo ida-neʼe. Irmaun sira neʼebé simu knaar neʼe tenke hakaʼas an atu la demora. Tuir loloos, se Ita-nia estudante Bíblia ida fó sai ba katuas sira iha Reuniaun-Fatin katak nia hakarak sai haklaken-naʼin, katuas sira bele arranja atu koʼalia hamutuk depois reuniaun. Diʼak atu koʼalia hamutuk iha fatin neʼebé hakmatek. Estudante tenke kumpre uluk kritéria sira tuirmai atu bele sai haklaken-naʼin neʼebé seidauk hetan batizmu:

1. (1) Nia fiar katak Bíblia mak Maromak nia Liafuan.​—2 Tim 3:16.

2. (2) Nia hatene no fiar hanorin báziku husi Bíblia, atu nuneʼe bainhira ema husu pergunta, nia bele hatán tuir Bíblia laʼós tuir relijiaun falsu nia hanorin ka tuir ninia hanoin rasik.​—Mt 7:21-23; 2 Tim 2:15.

3. (3) Nia halo tuir Bíblia nia mandamentu atu tuir reuniaun sira hamutuk ho Jeová nia povu se ninia situasaun permite.​—Sal 122:1; Ebr 10:24, 25.

4. (4) Nia hatene Bíblia nia hanorin kona-ba sala seksuál, inklui adultériu, poligamia katak iha kaben rua ka liu, no hahalok omoseksuál. Nia presiza moris tuir Bíblia nia hanorin kona-ba buat sira-neʼe. Se feto ho mane ida moris hamutuk iha uma ida, sira tenke kaben tuir lei.​—Mt 19:9; 1 Kor 6:9, 10; 1 Tim 3:2, 12; Ebr 13:4.

5. (5) Nia halo tuir Bíblia nia ukun-fuan neʼebé bandu atu labele lanu. Nia la uza droga ruma neʼebé estraga ninia hanoin no mós se neʼe laʼós rekomendasaun husi doutór.​—2 Kor 7:1; Éf 5:18; 1 Ped 4:3, 4.

6. (6) Nia komprende katak importante atu la ransu ho ema neʼebé hatudu hahalok la diʼak.​—1 Kor 15:33.

7. (7) Nia hakotu ona ligasaun ho relijiaun falsu ka ho organizasaun relijiozu neʼebé karik uluk nia hola parte bá. Nia para ona atu tuir sira-nia serimónia no la apoia tan sira-nia atividade.​—2 Kor 6:14-18; Apok 18:4.

8. (8) Nia la envolve tan iha buat polítiku.​—João 6:15; 15:19; Tgo 1:27.

9. (9) Nia fiar no moris tuir Isaias 2:4 hodi sai neutrál no la envolve an iha nasaun sira-nia problema.

10. (10) Nia hakarak duni atu sai Testemuña ba Jeová.​—Sal 110:3.

⁹ Katuas sira tenke husu tan pergunta se sira duvida kona-ba estudante Bíblia nia hanoin kona-ba kritéria sira-neʼe balu. Karik sira bele uza eskritura neʼebé temi iha kritéria sira-neʼe hodi koʼalia hamutuk ho nia. Importante atu nia komprende katak ema neʼebé haklaken hamutuk ho Testemuña ba Jeová tenke moris tuir Bíblia nia kritéria sira-neʼe. Buat neʼebé nia hatete sei ajuda katuas sira atu deside se nia hatene ninia responsabilidade no hakaʼas an ona atu kumpre kritéria sira tuir ninia kbiit hodi bele komesa hola parte iha serbisu haklaken.

¹⁰ Katuas sira labele demora atu fó-hatene ba estudante neʼe se nia kumpre kritéria ka lae. Baibain, sira bele halo nuneʼe depois koʼalia hamutuk tiha kona-ba pontu sira iha leten. Se nia kumpre kritéria, katuas sira bele simu nia nuʼudar haklaken-naʼin. (Rom 15:7) Katuas sira presiza anima nia atu komesa kedas haklaken no atu entrega ninia relatóriu haklaken iha fulan nia rohan. Katuas sira bele esplika katak bainhira estudante Bíblia ida kumpre kritéria atu sai haklaken-naʼin neʼebé seidauk hetan batizmu no hatama ona relatóriu haklaken ba dala primeiru, katuas sira sei prepara ba nia Kongregasaun nia Kartaun ba Haklaken-naʼin sira no rai ida-neʼe hamutuk ho kongregasaun nia dokumentu sira. Razaun tanbasá katuas sira rai informasaun pesoál hanesan neʼe mak atu organizasaun bele hatene oinsá atu kontinua tau matan ba Testemuña ba Jeová nia atividade neʼebé halaʼo iha mundu tomak. No mós katuas sira rai informasaun neʼe atu haklaken-naʼin bele hola parte iha kongregasaun nia atividade oioin no bele hetan apoia iha dalan espirituál. Katuas sira mós presiza fó-hanoin haklaken-naʼin foun sira katak kongregasaun sei rai didiʼak sira-nia informasaun pesoál tuir matadalan iha jw.org, parte “Informasaun kona-ba oinsá Testemuña ba Jeová proteje dadus”.

¹¹ Bainhira ita koñese diʼak liután haklaken-naʼin foun no hatudu interese ba dalan neʼebé nia laʼo ba oin, neʼe sei ajuda nia. Neʼe bele book nia atu hatama relatóriu haklaken beibeik no hakaʼas an liután atu serbí Jeová.​—Flp 2:4; Ebr 13:2.

¹² Bainhira katuas sira deside katak estudante Bíblia kumpre ona kritéria atu hola parte iha serbisu haklaken, nia bele simu livru Organizasaun neʼebé Halo Jeová nia Hakarak. Bainhira nia hatama tiha relatóriu haklaken ba dala primeiru, katuas sira sei fó sai anúnsiu ba kongregasaun katak agora nia sai ona haklaken-naʼin neʼebé seidauk hetan batizmu.

AJUDA LABARIK SIRA

¹³ Labarik sira mós bele kumpre kritéria atu sai haklaken-naʼin. Jesus simu labarik no haraik bensaun ba sira. (Mt 19:13-15; 21:15, 16) Maski inan-aman mak iha responsabilidade atu tau matan ba sira-nia oan, maibé ema seluk iha kongregasaun mós bele ajuda labarik sira neʼebé ho laran hakarak hola parte iha serbisu haklaken. Se Ita mak inan ka aman, Ita-nia ezemplu diʼak iha serbisu haklaken sei anima Ita-nia oan atu sai laran-manas hodi serbí Maromak. Bainhira labarik ida hatudu hahalok diʼak no ho hakarak rasik fó sai ninia fiar ba ema seluk, saida mak ita bele halo atu ajuda nia?

¹⁴ Diʼak atu labarik neʼe nia inan ka aman koʼalia ho katuas ida husi Komisaun Administrasaun ba Kongregasaun atu haree se labarik neʼe kumpre ona kritéria atu sai haklaken-naʼin. Koordenadór ba grupu katuas sei organiza katuas naʼin-rua atu bele koʼalia ho labarik neʼe hamutuk ho ninia inan-aman neʼebé Testemuña ka ho ema neʼebé iha responsabilidade atu tau matan ba nia neʼebé mós Testemuña. Katuas ida tenkesér membru husi Komisaun Administrasaun ba Kongregasaun. Se labarik neʼe iha koñesimentu báziku kona-ba lia-loos no hatudu katak nia hakarak hola parte iha serbisu haklaken, neʼe hatudu katak nia laʼo ba oin iha lia-loos. Katuas naʼin-rua sei hanoin kona-ba neʼe no mós hanoin kona-ba kritéria sira seluk neʼebé hanesan ho kritéria ba ema boot, no tuirmai deside se labarik neʼe bele sai haklaken-naʼin neʼebé seidauk hetan batizmu. (Lc 6:45; Rom 10:10) Bainhira katuas sira koʼalia hamutuk ho labarik ida kona-ba kritéria sira-neʼe, sira la presiza koʼalia kona-ba pontu balu neʼebé la aplika ba labarik sira.

¹⁵ Katuas sira tenke gaba labarik neʼe tanba nia laʼo ba oin no anima nia atu halo planu hodi hetan batizmu. Katuas sira mós presiza gaba inan-aman tanba sira hakaʼas an atu kuda lia-loos iha oan nia laran. Atu inan-aman bele kontinua hanorin sira-nia oan, katuas sira presiza hatudu ba sira informasaun ho títulu: “Lia-menon ba inan-aman Kristaun” iha pájina 179-181.

DEDIKASAUN NO BATIZMU

¹⁶ Se Ita hatene didiʼak kona-ba Jeová, hadomi nia, no agora kumpre kritéria husi Bíblia no hola parte iha serbisu haklaken, Ita presiza kontinua hakaʼas an atu hametin Ita-nia relasaun ho Jeová. Oinsá? Dedika Ita-nia moris ba nia no hatudu sai dedikasaun neʼe hodi hetan batizmu.​—Mt 28:19, 20.

¹⁷ Ita dedika an ba Maromak hodi halo orasaun ho laran no promete atu uza Ita-nia moris atu serbí nia no kontinua moris tuir ninia hakarak. Neʼe katak Ita presiza adora nia mesak deʼit ba nafatin. (Deut 5:9) Neʼe mak orasaun privadu entre Ita ho Maromak. La iha ema ida mak bele halo ida-neʼe ba Ita.

¹⁸ Maski nuneʼe, la toʼo atu hatete deʼit ba Jeová katak Ita hakarak sai ninia atan, Ita tenke halo buat seluk tan. Ita tenke hatudu sai ba ema seluk katak Ita dedika an ona ba Maromak. Ita halo nuneʼe liuhusi hetan batizmu iha bee laran, hanesan Jesus halo. (1 Ped 2:21; 3:21) Se Ita deside ona atu serbí Jeová no hakarak hetan batizmu, saida mak Ita bele halo? Ita bele fó sai ida-neʼe ba koordenadór ba grupu katuas. Nia sei organiza katuas balu atu koʼalia ho Ita atu buka-hatene se Ita kumpre kritéria husi Bíblia atu bele hetan batizmu. Atu hetan informasaun liután, favór ida haree “Lia-menon ba haklaken-naʼin neʼebé seidauk hetan batizmu” iha pájina 182-184, no “Pergunta ba ema neʼebé hakarak hetan batizmu” iha pájina 185-207.

RELATÓRIU KONA-BA SERBISU HAKLAKEN

¹⁹ Durante tinan barak ona, Jeová nia povu hetan anima husi relatóriu sira kona-ba oinsá adorasaun loos iha mundu tomak aumenta ba beibeik. Husi tempu neʼebé Jesus Kristu fó sai ba ninia dixípulu sira katak liafuan diʼak tenke haklaken iha mundu tomak, ema Kristaun neʼebé loos hakarak tebes atu hatene oinsá Jesus nia liafuan neʼe sai loos.​—Mt 28:19, 20; Mc 13:10; Após 1:8.

²⁰ Jesus nia dixípulu sira iha tempu uluk gosta rona relatóriu sira kona-ba serbisu haklaken. (Mc 6:30) Livru Apóstolu hatete katak maizumenus dixípulu naʼin-120 halibur hamutuk bainhira espíritu santu tun ba sira iha loron Pentekostes tinan 33 EC. Lakleur deʼit, dixípulu sira aumenta toʼo maizumenus naʼin-3.000 no tuirmai maizumenus naʼin-5.000. Bíblia hatete katak “Jeová kontinua aumenta ema barak tan neʼebé sei hetan salvasaun” no “amlulik barak mós sai fiar-naʼin”. (Após 1:15; 2:5-11, 41, 47; 4:4; 6:7) Dixípulu sira sente duni laran-manas hodi rona kona-ba neʼe. Informasaun sira-neʼe book duni dixípulu sira atu hakaʼas an liután hodi halo Maromak nia serbisu, maski ulun-naʼin relijiaun Judeu fó-terus makaʼas ba sira.

²¹ Maizumenus iha tinan 60-61 EC, apóstolu Paulo fó sai iha ninia karta ba kongregasaun iha Koloso katak liafuan diʼak “fó rezultadu no kontinua aumenta iha mundu tomak” no ema “haklaken ona ba kriasaun hotu iha lalehan nia okos”. (Kol 1:5, 6, 23) Ema Kristaun iha apóstolu sira-nia tempu halo tuir Maromak nia Liafuan, no espíritu santu fó kbiit ba sira atu halo serbisu haklaken ho badinas antes sistema Judeu nian remata iha tinan 70 EC. Kuandu ema Kristaun laran-metin rona relatóriu sira-neʼe, ida-neʼe anima tebes sira.

²² Hanesan neʼe mós ohin loron, Jeová nia organizasaun hakaʼas an atu hakerek relatóriu kona-ba serbisu neʼebé halo daudaun atu kumpre profesia iha Mateus 24:14 neʼebé hatete: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.” Nuʼudar Maromak nia atan, ita iha serbisu neʼebé urjente. Ita rasik presiza hakaʼas an atu hola parte iha serbisu haklaken antes mundu nia rohan toʼo mai. Jeová sei ajuda ninia povu atu halo serbisu neʼe toʼo hotu, no se ita hola parte iha serbisu neʼe, Jeová sei simu ita ho laran-kontente.​—Eze 3:18-21.

ITA-NIA RELATÓRIU HAKLAKEN

²³ Saida mak ita presiza hakerek iha ita-nia relatóriu haklaken? Iha Relatóriu Haklaken neʼebé ita-nia organizasaun prepara, ita bele haree informasaun saida mak ita presiza hakerek. Informasaun tuirmai neʼe mós bele ajuda ita.

²⁴ Iha parte “Publikasaun (inklui eletróniku)”, hakerek publikasaun hira mak Ita fahe ba ema neʼebé seidauk hetan batizmu nuʼudar Testemuña, inklui mós publikasaun eletróniku. Iha parte “Hatudu vídeo”, hakerek dala hira mak Ita hatudu vídeo.

²⁵ Iha parte “Vizita fali”, Ita presiza hakerek dala hira mak Ita vizita fali ema neʼebé seidauk dedika an no hetan batizmu nuʼudar Testemuña, atu ajuda sira haburas sira-nia interese ba lia-loos. Ita bele halo vizita fali liuhusi hasoru ema oin ba oin, hakerek karta, telefone, haruka mensajen ka e-mail, ka rai hela publikasaun ruma ba sira. Tempu ida-idak neʼebé Ita estuda Bíblia ho ema, Ita bele sura ida-neʼe nuʼudar vizita fali ida. Inan ka aman bele sura vizita fali ida semana-semana bainhira dirije adorasaun família nian hamutuk ho oan neʼebé seidauk hetan batizmu.

²⁶ Maski baibain, Ita estuda ho ema ida semana-semana, maibé fulan-fulan Ita sura ida-neʼe nuʼudar estudu ida deʼit iha Ita-nia relatóriu. Haklaken-naʼin sira presiza hakerek estudu Bíblia hira mak sira halaʼo ketaketak durante fulan ida. Bainhira Ita estuda ho ema ida neʼebé seidauk hetan batizmu, Ita sura ida-neʼe nuʼudar estudu Bíblia ida. Bainhira Komisaun Administrasaun ba Kongregasaun hili Ita atu fó estuda ba irmaun ka irmán neʼebé la ativu ona, Ita bele sura ida-neʼe nuʼudar estudu Bíblia ida. No mós bainhira Ita estuda Bíblia ho irmaun ka irmán neʼebé foin hetan batizmu maibé seidauk estuda hotu livru Moris Haksolok ba Nafatin, Ita bele sura ida-neʼe nuʼudar estudu Bíblia ida.

²⁷ Importante tebes atu hakerek “Oras” ho loloos. Neʼe katak oras neʼebé Ita uza atu haklaken husi uma ba uma, vizita fali, estuda Bíblia ho ema, ka haklaken iha dalan formál ka la formál ba ema neʼebé seidauk dedika an no hetan batizmu nuʼudar Testemuña. Se haklaken-naʼin rua mak haklaken hamutuk, sira naʼin-rua bele sura oras, maibé sira ida-idak sura sira rasik nia vizita fali ka estuda Bíblia neʼebé sira halo. Bainhira inan-aman hanorin sira-nia oan durante Adorasaun Família, sira rua bele sura oras ida deʼit kada semana. Irmaun sira bele sura tempu neʼebé sira uza atu hatoʼo diskursu públiku. Ema neʼebé tradús diskursu públiku iha reuniaun sira, mós bele sura tempu. Iha mós atividade importante balu neʼebé Ita halo maibé labele sura oras, hanesan prepara ba serbisu haklaken, tuir reuniaun atu organiza serbisu haklaken, halo Ita-nia atividade rasik durante tempu haklaken, no buat seluk tan.

²⁸ Haklaken-naʼin ida-idak tenke halo tuir ninia konxiénsia neʼebé treinu ona tuir Bíblia bainhira deside oinsá atu sura ninia oras haklaken. Haklaken-fatin balu iha ema barak no ema hela besik malu, maibé haklaken-fatin seluk mak izoladu no haklaken-naʼin sira presiza halo viajen dook atu haklaken. Haklaken-fatin ida-idak la hanesan. Haklaken-naʼin ida-idak nia dalan atu sura oras haklaken mós la hanesan. Irmaun sira iha Grupu Administradór la obriga Jeová nia povu iha mundu tomak atu halo tuir deʼit Grupu Administradór nia konxiénsia kona-ba oinsá atu sura oras haklaken, no mós la iha ema ida mak hetan knaar atu tesi-lia kona-ba neʼe.​—Mt 6:1; 7:1; 1 Tim 1:5.

²⁹ Ita tenke hakerek tempu neʼebé Ita uza iha serbisu haklaken ho oras neʼebé kompletu, labele hakerek minutu. Maibé, haklaken-naʼin neʼebé hasoru situasaun susar tanba idade ona, labele sai husi uma, hela iha fatin ba ferik-katuas sira, ka iha moras todan ruma ka defisiente, se sira uza deʼit minutu 15, minutu 30, ka minutu 45 atu haklaken, sira bele hakerek ida-neʼe iha relatóriu. Sira nafatin haklaken-naʼin neʼebé ativu. Arranju neʼe mós bele aplika ba haklaken-naʼin ida neʼebé hasoru situasaun ruma neʼebé hanetik nia atu bá haklaken durante tempu balu. Porezemplu, karik nia labele book an ba fulan ida ka liu tanba moras boot ka kanek todan. Arranju neʼe ba deʼit irmaun-irmán sira neʼebé hasoru situasaun ruma neʼebé hanetik sira atu bá haklaken. Komisaun Administrasaun ba Kongregasaun mak sei deside se haklaken-naʼin ida kumpre kritéria ba arranju neʼe.

KONGREGASAUN NIA KARTAUN BA HAKLAKEN-NAʼIN SIRA

³⁰ Katuas sira sei hakerek Ita-nia relatóriu haklaken ba fulan ida-idak iha Kongregasaun nia Kartaun ba Haklaken-naʼin sira. Kartaun sira-neʼe mak kongregasaun nian. Se Ita iha planu atu muda ba kongregasaun seluk, favór ida fó-hatene katuas sira iha kongregasaun. Sekretáriu ba kongregasaun sei haruka Ita-nia informasaun ba kongregasaun foun. Atu nuneʼe, katuas sira bele simu Ita no ajuda Ita iha dalan espirituál. Se Ita bá fatin seluk la toʼo fulan tolu, favór ida kontinua haruka Ita-nia relatóriu haklaken ba Ita-nia kongregasaun.

TANBASÁ MAK ITA FÓ RELATÓRIU HAKLAKEN?

³¹ Dala ruma, Ita haluha atu hatama Ita-nia relatóriu haklaken ka lae? Klaru katak dala ruma ema presiza fó-hanoin Ita. Maibé, se Ita iha hanoin neʼebé loos kona-ba hatama relatóriu haklaken no komprende tanbasá neʼe importante, ida-neʼe sei ajuda Ita atu la haluha hatama Ita-nia relatóriu haklaken.

³² Ema balu karik husu: “Jeová hatene saida mak haʼu halo iha ninia serbisu, entaun tanbasá mak haʼu presiza hatama relatóriu haklaken?” Loos duni, Jeová hatene saida mak ita halo, no nia hatene se ita halo ninia serbisu ho laran tomak ka lae. Maibé hanoin-hetan katak Jeová hakerek kona-ba loron hira mak Noé iha ró laran no tinan hira mak ema Izraél halo viajen iha rai-fuik. Maromak mós hakerek kona-ba ninia atan hira mak laran-metin no atan hira mak la halo tuir. Nia mós hakerek buat oioin neʼebé ema Izraél halo hodi bele manán rai-Kanaan no buat neʼebé ema Izraél nia juís sira halo. Sin, nia hakerek buat barak kona-ba ninia atan sira-nia atividade. Buat hotu neʼe hakerek iha Bíblia laran, neʼe ajuda ita hatene ho klaru Maromak nia hanoin kona-ba hatama relatóriu haklaken ho loloos.

³³ Istória neʼebé hakerek iha Bíblia laran hatudu katak Jeová nia povu hakerek informasaun no relatóriu ho loloos. Dala barak tanba Bíblia hakerek istória neʼebé temi númeru sira ho loloos, ida-neʼe book ita-nia laran. Haree toʼok ezemplu balu tuirmai: Génesis 46:27; Éxodo 12:37; Juís 7:7; 2 Reis 19:35; 2 Krónikas 14:9-13; João 6:10; 21:11; Apóstolu 2:41; 19:19.

³⁴ Ita-nia relatóriu haklaken la inklui buat hotu neʼebé ita halo iha ita-nia adorasaun ba Jeová, maski nuneʼe relatóriu sira-neʼe mak importante iha Jeová nia organizasaun. Iha apóstolu sira-nia tempu, bainhira apóstolu sira fila fali husi serbisu haklaken, sira konta ba Jesus “buat hotu neʼebé sira halo no hanorin”. (Mc 6:30) Dala ruma, ita-nia relatóriu haklaken bele hatudu sai buat neʼebé ita presiza hadiʼa liután iha serbisu haklaken. Relatóriu haklaken mós bele hatudu katak maski atividade balu aumenta ona, maibé karik atividade seluk lae, porezemplu haklaken-naʼin ladún aumenta ka menus. Karik kongregasaun presiza simu anima liután ka iha problema ruma neʼebé presiza rezolve. Katuas sira neʼebé halaʼo didiʼak sira-nia knaar sei haree relatóriu sira no hakaʼas an atu hadiʼa situasaun ruma neʼebé hanetik ema ida ka kongregasaun tomak atu laʼo ba oin.

³⁵ Relatóriu haklaken sira mós importante ba organizasaun atu hatene fatin neʼebé mak presiza liután haklaken-naʼin. Porezemplu, área neʼebé mak haklaken-naʼin aumenta barak, área neʼebé mak haklaken-naʼin ladún aumenta, no livru saida mak presiza atu ajuda ema aprende lia-loos. Relatóriu haklaken mós ajuda organizasaun atu buka-hatene publikasaun hira mak presiza ba serbisu haklaken iha área oioin iha mundu tomak no tuirmai halo planu atu prodús publikasaun tuir área ida-idak nia presiza.

³⁶ Ita hotu hetan anima bainhira rona relatóriu sira. Ita kontente tebes bainhira rona kona-ba serbisu neʼebé irmaun-irmán sira halo hodi habelar liafuan diʼak iha mundu tomak. Bainhira ita haree relatóriu kona-ba haklaken-naʼin neʼebé aumenta ba beibeik, neʼe ajuda ita hatene oinsá Jeová nia organizasaun sai boot liután. Esperiénsia sira anima ita no book ita atu hola parte liután iha serbisu haklaken. (Após 15:3) Hatama ita-nia relatóriu haklaken mak importante tebes. Neʼe hatudu katak ita hanoin irmaun-irmán sira iha fatin hotu. No ita mós hatudu katak ita hakruʼuk ba arranju husi Jeová nia organizasaun.​—Lc 16:10; Ebr 13:17.

HALO PLANU ESPIRITUÁL

³⁷ Ita la presiza kompara ita-nia serbisu haklaken ho ema seluk nian. (Gal 5:26; 6:4) Ita ida-idak nia situasaun la hanesan. Maski nuneʼe, ita sei hetan benefísiu se ita halo planu atu uza didiʼak ita-nia tempu iha serbisu haklaken. Neʼe sei ajuda ita atu buka-hatene oinsá ita laʼo ba oin. Ita mós sei sente kontente bainhira ita kumpre ita-nia planu sira.

³⁸ Klaru katak Jeová ajuda daudaun ita atu halibur ema barak liután neʼebé nia sei proteje durante “terus boot”. Ohin loron, Isaias nia profesia tuirmai neʼe sai loos. Nia hatete: “Sira neʼebé uitoan sei sai rihun ida no povu neʼebé kiʼik sei sai nasaun neʼebé forte. Haʼu, Jeová, haʼu rasik mak sei halo sira sai barak lalais liu iha tempu neʼe.” (Apok 7:9, 14; Isa 60:22) Ita iha priviléjiu boot atu sai haklaken-naʼin ba liafuan diʼak durante loron ikus sira-neʼe.​—Mt 24:14.