Oinsá atu uza gravasaun sira
1. Ita bele hetan livru oioin iha ita-nia sítiu maibé saida tan mak ita bele hetan?
1 Ema barak gosta uza jw.org hodi lee liafuan neʼebé furak no loos kona-ba lia-loos. (Eclesiastes [Pengkhotbah] 12:10) Maibé, ita rona ba gravasaun sira ka lae? Liuhusi ita-nia sítiu, ita bele rona informasaun barak husi gravasaun sira. Oinsá mak gravasaun sira diʼak ba ita?
2. Iha dalan saida mak ita bele uza gravasaun ba estuda mesak ka ba ita-nia estuda família?
2 Estuda mesak ka estuda família: Bainhira ita ba fatin ruma ho karreta ka halo atividade loroloron nian ruma, diʼak atu rona ba gravasaun Bíblia nian, ka livru sira. Halo hanesan neʼe bele ajuda ita atu uza didiʼak ita-nia tempu. (Éfeso 5:15, 16) Iha tempu halaʼo adorasaun família nian, ita mós bele lee tuir gravasaun husi livru neʼebé ita uza daudauk ba ita-nia adorasaun família nian. Diʼak tebes atu uza gravasaun ba estuda Bíblia mesak, tanba neʼe bele ajuda ita hadiʼa dalan neʼebé ita lee. Ka se ita mak aprende hela língua balu, neʼe mós bele ajuda ita.
3. Iha ita-nia haklaken fatin, karik gravasaun diʼak ba sé deʼit?
3 Ba serbisu haklaken: Iha haklaken fatin iha ema barak sente sira laiha tempu atu lee. Ba sira, karik sira hakarak rona kona-ba gravasaun deʼit. No bainhira ita hasoru ema neʼebé koʼalia língua seluk, se sira rona Bíblia nia mensajen iha sira-nia “lian rasik” karik neʼe sei halo sira hakarak hatene liután. (Apóstolu 2:6-8) Iha rai balu, rona mak buat importante ida husi sira-nia kultura. Porezemplu, iha ema Hmong nia kultura, sira-nia toman mak konta fali sira-nia istória ba jerasaun foun ho ibun deʼit no sira-nia kbiit atu rai informasaun neʼebé sira rona mós diʼak tebes. Kultura barak husi rai-Áfrika mós gosta aprende buat foun liuhusi istória neʼebé sira rona.
4. Hanoin kona-ba pergunta saida mak bele ajuda ita hodi hatene oinsá atu ajuda ema iha ita-nia haklaken fatin?
4 Iha Ita-nia haklaken fatin, se Ita loke gravasaun ruma iha uma-naʼin nia língua ba nia, bele ajuda nia ka lae? Se ita haruka gravasaun liuhusi email ba ema ida, neʼe bele ajuda nia ka lae? Diʼak ka lae atu download gravasaun kona-ba livru ida iha CD atu fó ba uma-naʼin neʼebé interese no karik bele fó ho livru ida neʼebé iha CD neʼe ba nia? Se ita fahe livru, broxura, tratu, ka revista nia gravasaun tomak ida ba ema, ita bele sura iha ita-nia relatóriu. Ita bele uza ita-nia gravasaun sira ba estuda mesak no mós bele uza nuʼudar fini lia-loos nian.—1 Korinto 3:6.