Uza livru Bíblia Hanorin ho didiʼak

Atu ajuda ita-nia estudante laʼo ba oin iha lia-loos, ita bele uza pergunta hahú husi lisaun sira, apéndise no kaixa revizaun husi livru Bíblia Hanorin. Tanba se estudante Bíblia ida mak aprende ona saida loos mak Bíblia hanorin, no uza buat neʼebé nia aprende iha ninia moris, nia mós sei laʼo ba oin no fó fuan neʼebé diʼak.—Salmo (Mazmur) 1:1-3.

Pergunta hahú husi lisaun sira: Lisaun ida-idak hahú ho pergunta balu neʼebé bele hetan resposta iha lisaun ida-idak. Karik ita bele uza pergunta sira-neʼe atu halo estudante hakarak hatene liután ba resposta sira. Ka ita bele hahú hodi husu pergunta sira-neʼe ba nia. Se nia fó resposta neʼebé sala, lalika korrije nia, tanba ninia resposta neʼe bele ajuda ita atu hatene pontu saida mak ita presiza fó atensaun liu bainhira estuda ho nia.—Provérbios (Amsal) 16:23; 18:13.

Apéndise: Se estudante mak komprende ona pontu sira iha kapítulu laran, ita bele anima nia atu lee informasaun sira husi apéndise iha uma deʼit. Loron seluk ita bá fali atu estuda ho nia mak uza minutu ida ka rua atu koʼalia hamutuk kona-ba apéndise neʼe hodi haree toʼok nia komprende loloos ona ka lae. Maibé se ita hanoin katak diʼak liu atu koʼalia hamutuk ho nia kona-ba apéndise sira neʼebé liga ho informasaun neʼebé ita estuda daudauk ho nia, diʼak atu lee parágrafu husi apéndise sira no husu pergunta ruma neʼebé ita prepara ona.

Kaixa revizaun: Iha kapítulu ida-idak nia rohan iha kaixa ida naran “Saida mak Bíblia Hanorin”. Liafuan sira iha kaixa neʼe mak fó resposta ba pergunta ida-idak iha kapítulu nia hahú. Kaixa neʼe bele ajuda ita atu hatene se estudante neʼe komprende ona, no nia bele esplika pontu importante sira ka lae. Lee hamutuk liafuan no mós eskritura sira, depois husu estudante atu uza eskritura sira-neʼe hodi esplika fali tanbasá mak liafuan sira iha kaixa neʼe loos.—Apóstolu 17:2, 3.