MORIS NUʼUDAR EMA KRISTAUN
Apoia Jeová nia morál neʼebé santu
Maromak Jeová mak hun ba morál neʼebé aas. Porezemplu, nia fó sai katak bainhira mane no feto ida kaben, neʼe ba nafatin. (Mt 19:4-6, 9) Nia odi hahalok sala seksuál. (1Ko 6:9, 10) Nia mós fó prinsípiu kona-ba dalan atu hatais no hadiʼa an hodi hatudu katak ninia povu mak la hanesan ho ema seluk.—Deu 22:5; 1Ti 2:9, 10.
Ohin loron, ema barak lakohi moris tuir Jeová nia morál sira. (Rom 1:18-32) Sira halo tuir deʼit ema seluk kona-ba hatais, hahalok, no dalan neʼebé ema hadiʼa an. Ema barak gaba an kona-ba sira-nia hahalok aat sira-neʼe, no goza ema neʼebé lakohi halo tuir sira.—1Pe 4:3, 4.
Nuʼudar Testemuña ba Jeová, ita tenke hakaʼas an hodi apoia Jeová nia morál sira. (Rom 12:9) Oinsá? Ho matenek, ita presiza fó sai kona-ba saida mak Maromak simu no la simu. Maibé ita rasik mós presiza moris tuir Maromak nia morál santu sira. Porezemplu, bainhira ita hili saida mak ita sei hatais ka oinsá atu hadiʼa an, husu ba ita-nia an: ‘Haʼu-nia desizaun haleno Jeová nia morál ka mundu nian? Dalan neʼebé haʼu hatais no hadiʼa an hatudu katak haʼu mak ema kristaun neʼebé hadomi Maromak ka lae?’ Ka bainhira atu haree programa ka filme ida, husu ba ita-nia an: ‘Jeová sei hanoin oinsá kona-ba programa neʼe? Programa neʼe haleno sé-nia morál? Buat neʼebé haʼu hili nuʼudar atividade halimar nian sei halo fraku haʼu-nia relasaun ho Jeová ka lae? (Sal 101:3) Haʼu-nia desizaun sira sei halo haʼu-nia família ka ema seluk sidi ka lae?’—1Ko 10:31-33.
Tanbasá mak importante atu apoia Jeová nia morál neʼebé santu? Tanba lakleur tan, Kristu Jesus sei halakon nasaun sira hamutuk ho hahalok aat hotu. (Eze 9:4-7) Só sira neʼebé halo Maromak nia hakarak deʼit mak sei hetan moris. (1Jo 2:15-17) Tan neʼe, mai ita apoia Jeová nia morál sira ho laran tomak, hodi ema neʼebé haree ita-nia hahalok diʼak sei fó glória ba Maromak.—1Pe 2:11, 12.
Dalan neʼebé haʼu hatais no hadiʼa an hatudu saida kona-ba haʼu-nia morál sira?
HAREE VÍDEO SAI JEOVÁ NIA BELUN—MANE IDA KABEN HO FETO IDA, DEPOIS HATÁN BA PERGUNTA SIRA TUIRMAI NEʼE:
Tanbasá matenek atu moris tuir Jeová nia morál sira?
Tanbasá diʼak ba inan-aman sira atu hanorin Jeová nia morál ba oan bainhira sira sei kiʼik?
Oinsá mak ita hotu, maski idade kiʼik ka boot, bele ajuda ema atu hetan benefísiu husi Jeová nia laran-diʼak?