Uza vídeo atu hanorin Ita-nia estudante

Vídeo no dezeñu sira ajuda ema atu tau atensaun ba buat neʼebé sira aprende, no sira bele komprende diʼak liután no hanoin-hetan buat neʼebé ita hanorin. Ita-nia Mestre Boot, Jeová mós uza buat neʼebé matan bele haree atu hanorin lisaun importante. (Gén 15:5; Jer 18:1-6) Jesus mós hanorin iha dalan neʼebé hanesan. (Mt 18:2-6; 22:19-21) Durante tinan hirak-neʼe nia laran, ita bele haree ho klaru katak ita-nia vídeo sira lori benefísiu ba ema barak. Ita uza didiʼak vídeo sira bainhira hanorin Ita-nia estudante Bíblia ka lae?

Iha vídeo sanulu neʼebé prepara ona hodi ajuda ita atu hanorin ema hodi uza broxura Liafuan Diʼak Husi Maromak. Maioria, vídeo sira-neʼe nia títulu liga ho pergunta ho letra mahar iha broxura laran. Broxura dijitál iha sítiu jw.org® mós inklui ho link neʼebé sei fó-hanoin ita bainhira mak atu hatudu vídeo. Iha mós vídeo seluk neʼebé liga ho livru oioin iha Ekipamentu hanorin nian.

Ita no Ita-nia estudante estuda daudaun tópiku neʼebé susar ba Ita-nia estudante atu komprende ka lae? Ka Ita-nia estudante hasoru daudaun situasaun susar ka lae? Buka toʼok vídeo sira iha sítiu jw.org/tdt no JW Broadcasting® atu bele ajuda nia. Karik Ita no Ita-nia estudante bele haree vídeo hamutuk no koʼalia kona-ba ida-neʼe.

Kada fulan, ita-nia organizasaun sempre fó sai vídeo foun. Bainhira haree vídeo sira-neʼe, hanoin toʼok kona-ba oinsá Ita bele uza vídeo sira-neʼe atu hanorin ema.