Hetan benefísiu liután liuhusi estuda mesak

TANBASÁ IMPORTANTE: Estuda mesak Maromak nia Liafuan ajuda ita atu bele komprende didiʼak “luan, naruk, aas no kleʼan” kona-ba lia-loos. (Éf 3:18) Neʼe mós ajuda ita atu iha hahalok loos no la halo sala iha mundu aat neʼe, no “kontinua kaer metin liafuan moris nian”. (Flp 2:15, 16) Hodi estuda mesak Maromak nia Liafuan, ita bele hili informasaun saida mak ita hakarak estuda tuir ita-nia presiza. Oinsá mak ita bele hetan benefísiu liután husi lee no estuda Bíblia?

OINSÁ ATU HALO IDA-NEʼE:

• Tau kór ba versíkulu sira no halo nota iha Bíblia neʼebé Ita uza atu estuda, ka iha telefone ka tablet

• Nuʼudar Ita lee Maromak nia Liafuan, husu ba Ita-nia an: ‘Sé? Saida? Bainhira? Iha neʼebé? Tanbasá? Oinsá?’

• Buka faktu sira. Uza buat neʼebé ita-nia organizasaun fó hodi buka informasaun. Buka tuir tópiku ka versíkulu sira

• Medita kona-ba buat neʼebé Ita lee, no haree oinsá informasaun neʼe bele aplika ba Ita

• Aplika buat neʼebé Ita aprende iha Ita-nia moris loroloron.—Lc 6:47, 48

HAREE VÍDEO “KONTINUA KAER METIN BA LIAFUAN MORIS NIAN” LIUHUSI ESTUDA MESAK, DEPOIS HATÁN BA PERGUNTA SIRA TUIRMAI NEʼE:

• Ema balu hatete saida kona-ba estuda mesak?

• Tanbasá mak presiza halo orasaun antes atu estuda mesak?

• Saida mak bele ajuda ita atu komprende liután buat neʼebé ita lee iha Bíblia?

• Ita bele uza marka saida deʼit atu tau sinál iha ita-nia Bíblia neʼebé ita uza atu estuda?

• Tanbasá mak importante tebes atu medita bainhira estuda Maromak nia Liafuan?

• Ita presiza halo saida ho buat neʼebé ita aprende?