Oinsá atu ajuda bainhira dezastre akontese

Dezastre naturais akontese barak liután ohin loron. Bainhira dezastre akontese, irmaun sira presiza halo arranju atu fó ajuda no organiza ho didiʼak. Ho razaun neʼe, Grupu Administradór halo arranju atu harii Departamentu ba Dezastre iha sukursál ida-idak.

Bainhira irmaun sira iha departamentu neʼe hatene kona-ba dezastre ruma, sira kontaktu kedas katuas kongregasaun atu buka-hatene saida mak irmaun-irmán sira presiza. Se sira haree katak estragu neʼe aat tebes no susar ba irmaun-irmán sira atu rezolve rasik, sukursál sei fó knaar ba irmaun sira neʼebé kumpre kritériu atu organiza serbisu atu fó ajuda. Irmaun sira-neʼe karik sei husu voluntáriu sira ka kontribuisaun ho sasán espesífiku, ka sira mós bele sosa no fahe sasán neʼebé presiza.

Arranju neʼe lori benefísiu barak. Neʼe ajuda atu hamenus serbisu, la konfuzaun, no la estraga osan no materiál. Neʼe bele akontese kuandu irmaun-irmán sira halo buat ruma ho inisiativu rasik.

Irmaun sira neʼebé hetan knaar husi sukursál bele deside osan hira mak sei uza no presiza voluntáriu naʼin-hira. Sira mós bele hasoru autoridade sira neʼebé karik bele ajuda atu halo lalais serbisu. Entaun ita labele halo arranju pesoál atu halibur osan, haruka sasán, ka bá área neʼebé kona dezastre se ita la hetan knaar.

Maski nuneʼe, bainhira dezastre akontese, ita hakarak ajuda. (Ebr 13:16) Ita hadomi irmaun-irmán sira! Saida mak ita bele halo? Importante liu mak ita bele halo orasaun kona-ba vítima sira no sira neʼebé fó ajuda. Ita mós bele fó kontribuisaun ba serbisu iha mundu tomak. Hodi tuir matadalan husi Grupu Administradór, sukursál bele komprende diʼak liu oinsá atu uza kontribuisaun. No se Ita rasik hakarak atu ajuda, Ita bele prenxe formuláriu Local Design/Construction Volunteer Application (DC-50) atu hatudu katak Ita prontu ajuda.

HAREE VÍDEO BEE SAʼE NO ESTRAGA SIDADE SIRA IHA BRAZÍL, DEPOIS HATÁN BA PERGUNTA TUIRMAI:

Saida mak Ita gosta kona-ba dalan neʼebé Testemuña ba Jeová fó ajuda bainhira inundasaun iha Brazíl iha tinan 2020?